Iraida Thijsen, nutricionista di IBiSA:
ORANJESTAD (AAN) – Den e contexto di Dia Mundial di Curazon cu ta wordo conmemora awe, 29 di September, señora Iraida Thijsen, Nutricionista di IBiSA, a menciona cu cifranan cu nan tin ta indica cu 33% di e causanan di morto den nos poblacion, ta problema di curazon y ader; esta, un di cada tres.
El a subraya cu esaki tin di haber cu e sistema di come di e comunidad. “Sigur, nos ta come hopi, nos ta consumi hopi cuminda procesa, nos gusta salo cu tin e tendencia di subi e presion, cual ta un factor di riesgo pa problemanan di curazon. Tin hende cu tin un bida di hopi stress eyfo, nan no ta haci actividad fisico, por ta nan ta bebe di mas. Pa humamento, danki Dios tin ley aworaki pa hacie un tiki mas dificil, pero tur ta factor cu ta hunga un rol, den hayamento di problemanan di curazon y ader.
Thijsen a menciona cu IBiSA no tin ningun actividad planea pa Dia di Curazon, precisamente pasobra nan tin caba 4 dia di actividad conhuntamente cu Aruba Bank. “Net pa dia 29 di September, Dia Mundial di Curazon, nos a acerca diferente instancia pa pone e luznan cora pa conmemora y recorda e hendenan pa cuida nan curazon, y claro, nos tambe ta bayendo na pianan di trabao pa stimula esey. Pues, pa cuida bo mes, haci cambionan den bo estilo di bida manera come mas saludable, haci actividad fisico y siña deal cu stress. E otro partnernan den Plataforma tambe ta haciendo di nan banda, por ta den nan seno cu nan personal, pa conmemora e Dia Mundial di Curazon”, Iraida Thijsen a conclui.
