ReefGrazers ta contribui na restauracion di coral y pesca sostenibel

Bonaire, Saba, St. Eustatius – Un iniciativa nobo cu ta yama proyecto ReefGrazers lo cuminza na september, cu e meta di restaura rifnan di coral den Caribe y pa apoya practicanan di pesca sostenibel.

E proyecto aki ta tuma lugar na Bonaire, St. Eustatius y Saba, den colaboracion cu diferente partner, incluyendo universidadnan y organisacionnan local di maneho di naturalesa.

Colaboracion pa conservacion di naturalesa E proyecto ReefGrazers ta un colaboracion entre Hogeschool Van Hall Larenstein, Wageningen Universiteit, Wageningen Marine Research, Entidad Publico Saba, STINAPA Bonaire, STENAPA, Saba Conservation Foundation y Wereld Natuur Fonds.

E colaboracion aki a ser desaroyá pa contribui na e conservacion di coralnan caribense, cu for di decada di 70 a sufri dañonan grave como resultado di cambio climatico, horcan, malesa y polucion. E factornan aki a lanta un crecemento masivo di alganan, cu ta haci dificil pa coralnan por reconstrui. E rason principal pa e crecemento di alganan ta falta di bestianan cu ta come alga. Sobrepesca y malesa a reduci e cantidad di bestianan cu ta come alga.

Aumento di bestianan cu ta come alga Rifnan saludabel, domina pa coral en bes di alga, ta di gran importancia pasobra nan ta proteha costa, sostene peskeria y atrae turista. Tur e cosnan aki ta esencial pa e economia y cultura den Caribe. E proyecto ReefGrazers ta enfoca riba e uzo di bestianan nativo cu ta come alga, manera e cangreu ‘Caribische koningskrab’, sea urchin blanco, kiwa, pa controla e crecemento di alga. E proyecto lo investiga e poblacion actual di e animalnan aki, evalua nan impacto riba e rifnan y investiga e exito di esfuersonan pa aumenta nan cantidad.

Pesca sostenibel Ademas, lo analiza practicanan local di pesca y explora posibilidadnan pa pesca sostenibel basa riba e aumento di animalnan. Esaki ta duna oportunidad nobo pa peskeria chikito. E proyecto aki ta importante, no solamente pa Bonaire, St. Eustatius y Saba, pero por funciona como modelo di restauracion pa rifnan di coral na e otro islanan den Caribe.