Red Cross hunto cu clubnan di Kiwanis a yuda mas di 100 mucha por bay scol bek

ORANJESTAD (AAN): Recientemente cuater organizacion a uni forsa pa duna muchanan di Aruba material di scol y

un dia special pa un bon comienzo pa e aña escolar nobo, durante e Proyecto ‘Back to School 2026”

   E proyecto a wordo organiza den colaboracion cu Kiwanis Club of Aruba, Kiwanis Club of Palm Beach, Kiwanis Club of San Nicolas y Red Cross Aruba, cu un meta comun: prepara e muchanan pa nan regreso na scol, mientras cu nan ta disfruta di un dia yen di alegria, amistad, movimiento y atencion.

E actividad a tuma lugar na Centro di Bario Dakota, unda un total di 100 mucha a participa na diferente actividad enfoca riba salud, higiene, deporte y recreacion.

   Back to School ta trata di mas cu solamente material escolar. E organizadornan a duna e muchanan un experiencia positivo, mientras cu nan a siña tambe mas tocante e importancia di higiene personal, salud y un estilo di bida activo.

   Como parti di e programa, e muchanan a ricibi un presentacion interactivo tocante higiene y salud, den colaboracion cu Directie Volksgezondheid. E informacion a wordo presenta na un manera simpel y divertido, adapta na e edad di e muchanan.

   Tambe tabatin diferente actividad deportivo y wega, unda e muchanan por a move, hunga, traha hunto y, naturalmente, disfruta.

   Un di e momentonan special di e dia tabata e cortamento gratis di cabey, unda muchanan por a haya un corte y drenta e aña escolar nobo cu mas confianza y un sonrisa grandi. Un danki imenso ta bay na tur barbers y hairdressers cu a ofrece nan tempo y talento pa haci esaki posibel.

   Colaboracion ta haci e diferencia: E Proyecto Back to School ta un bunita ehempel di locual nos por logra ora organizacionnan, companianan y boluntarionan den comunidad uni forsa pa un meta comun: inverti den nos muchanan y den nan bienestar.

   Kiwanis ta dedica na mehora e bida di muchanan , mientras cu Red Cross Aruba ta traha diariamente pa un comunidad mas fuerte, saludable y resiliente.

   Door di e colaboracion entre e diferente organizacionnan, e muchanan por a disfruta un dia unda salud, higiene, deporte, diversion, autoestima y amistad tabata central.  Un danki imenso na tur patrocinador, partners y boluntarionan

Un proyecto di e magnitud aki no ta posibel sin e apoyo di un comunidad cu ta kere den nos muchanan. Sin laga afor tur Kiwanians y Red Cross volunteers cu a duna nan tempo, energia, dedicacion y entusiasmo pa haci e dia aki un realidad. Sin boso apoyo, compromiso y generosidad, esaki no lo tabata posibel.

   Cu e Proyecto Back to School 2026, Kiwanis Club of Aruba, Kiwanis Club of Palm Beach, Kiwanis Club of San Nicolas y Red Cross Aruba kier sigui stimula mas colaboracion den comunidad pa sigui inverti den e bienestar y futuro di nos muchanan. Ta ora nos uni nos forsa, nos ta crea un impacto positivo pa nos comunidad. Cada mucha merece un bon comienzo di aña escolar, un oportunidad pa crece y un comunidad cu ta stima y apoya nan.