Red Cross Aruba preparando su fiesta anual 2023 pa recauda fondo cu lo yama “Starry Nights”

Indra Pereira, Gerente di Mercado y Fundraising:

ORANJESTAD (AAN) – Durante un conferencia di prensa cu a tuma lugar na Restaurant Passions on the Beach, señora Indra Pereira, Gerente di Mercadeo y Fundraising di Red Cross Aruba, a duna informacion tocante nan evento anual, pa recauda fondo, yama “Starry Nights” cu lo tuma lugar dia 24 di Juli venidero, den Passions mes.

E fondonan recauda ta pa algun di e programanan social cu Red Cross Aruba ta organiza durante e aña.

Indra Pereira a menciona cu Red Cross Aruba ta orguyoso di yuda comunidad cu varios programa henter aña, manera nan “Food Kitchen” na Lagoweg, cu ta nan branch na San Nicolas, unda ta sirbi cuminda tres biaha pa siman na personanan cu mas tin mester di dje.

Apart di esaki nan ta yuda nan tambe cu paña, zapato, y productonan pa cuido personal. Tambe nan ta yuda pa medio di un programa cu ta consisti di articulonan femenino pa yuda personanan cu no tin manera pa cumpra esakinan.

Cu e programa aki, recientemente nan a caba di haci entrega di 1.300 pakete di cuido personal y productonan femenino na scolnan basico y director di SKOA, pa yuda muchanan cu tin mester di esaki.

Red Cross Aruba ta hopi contento cu nan ta yuda cu esaki y ta yena nan cu hopi satisfaccion, pasobra ta conoci cu productonan di higiene personal y di uso femenino, no ta mas den e presupuesto di hopi famia, specialmente famianan cu ta consisti di varios hende muher.

Tambe Red Cross ta brinda un programa cu ta yama Biba Vida, cu ta pa adultonan mayor, y cada pasa un luna nan ta organiza eventonan social, educativo y recreacional, pa un grupo di mas of menos 80 adulto mayor. Nan tin tambe varios programa mas, of actividad, cu nan ta  desaroya henter aña y asina ta yuda hopi persona den nos comunidad.

Pereira a indica cu, cu compra di e ticketnan pa e evento aki, cu lo tuma lugar dia 24 di Juli, ta yuda Red Cross Aruba pa sigui brinda e proyectonan menciona.

El a sigui bisa cu e anochi aki ta priminti di ta uno magico. E biaha aki e lo ta bao di streanan na Passions on the beach, cu ta e inspiracion pa nan tema “Starry Nights” di e famoso pintor Vincent Van Gogh. Indra Pereira a gradici a sosten y acogida di e restaurant menciona y e sponsornan pa nan aporte, pa haci e anochi aki uno fabuloso.