ORANJESTAD (AAN): Awe Diabierna 9 di September, lo bay tin e apertura oficial di e Aña Academico 2022-2023 na Universidad di Aruba.
Rector Viola Heutger a indica cu segun ley di Aruba, riba e di 2ndo Diabierna di September tin e apertura di e Aña Academico nobo.
E apertura lo ta un acto academico unda nan lo demostra cu e Universidad ta conecta cu e isla y sociedad. Nan a invita Gobernador di Aruba cu lo ta presente, como tambe Prome Ministro di Aruba, y a pidi Ministro di Enseñanza pa duna un discurso. Universidad ta spera di por saluda tur e invitadonan aki, hunto cu e studiantenan nobo y tambe e mayornan, na e acto aki.
Pa 2022-2023, Universidad lo duna bon bini na 746 studiante cu lo sigui nan estudio. Rector Heutger ta pensa cu durante e Aña Academico e cantidad di studiante lo sigui subi, como cu awor tambe nan lo bay ta dunando les pa e Master’s den Business Administration, y na comienzo di aña venidero nan lo bay cuminza cu dos programa mas di Master’s, di cual uno ta den System and Sustainable Island Solution, y e otro ta riba OGN Master Organization Management and Governance.
Rector Huetger a indica cu Universidad di Aruba ta sigui bay dilanti, y ta keda reforza loke nan a cuminza cune, y e aña aki e acreditacionnan ta poni den plan, y nan ta hopi orguyoso di esey. Nan por demostra cu nan ta cumpli cu acreditacion externo, y e internacionalizacion ta sigui cu colaboracion cu otro Universidadnan den exterior. Y nan ta ricibiendo bon reaccion di e otro institutonan educacional halto di exterior tambe.
E ta demostra tambe, cu Universidad di Aruba ta atractivo tambe pa studiantenan di exterior. Mas y mas studiantenan ta opta pa bin sigui nan les aki.
E Universidad ta creciendo, y danki na bon colaboracion cu Obispado di Willemstad, nan por a huur algun espacio di Centro Educativo Central, unda awor Universidad tin un bunita sala di estudio, y algun espacio mas. Nan ta contento cu e expansion ey. Ta spera cu pronto cu yudanza di Gobierno, lo por bay restaura e Maria Convent y kizas entrante 2023 lo por bay usa esaki.
Tambe tin idea di desaroya un lugar di hospedahe (“dorm”) pa studiantenan den Caya Principal di Oranjestad. Di e forma ey e studiantenan cu bin di exterior, por haya lugar di biba y keda ora cu nan ta bishita Universidad.
Algo notable ta cu awor Universidad a avanza mucho mas den dunamento di les online tambe. A ofrece tur e profesornan, y personal un curso con pa anda cu dunamento di les online, y esey a bay na un forma sublime.
