Den cumplimento cu e honor di analisa e forsa di un Reina legendario
*E forsa tras di Reino Uni pa “Rule the Waves” den e Era di Tempestad
* Fe ta e herencia grandi di e Gobernador Supremo di Iglesia di Inglatera
ORANJESTAD(AAN)- Ora papia di un Reina, mundo ta mira un trono, un corona. Mundo tin problema pa mira e exigencianan cu ta wordo pone riba e persona cu lo mester lubida su mes completamente pa entrega na un pais, e imagen perfecto mara na e titulo di “Su Mahestad”.
Ayera mundo a despedi di Su Mahestad Reina Elizabeth II, e forsa tras di Reino Uni den uno di e temporadanan mundial cu mas cambio di hende y sociedad humano.
Inglatera, sede di Reino Uni, ta un isla dilanti costa Europeo. E ta wordo considera Europeo, pero ta defende su caracter unico.
“Rule Britannia...Britannia Rules the Waves” ta resona te awe pa. Britannia, e figura femenino di un guerero, ta presenta Great Britain.
“Rule the Waves” tabata e encargo di tempo na Reina Elisabeth, naci na entrada di e siglo cu Reino Uni a wordo ataca pa estilonan nobo di bida, globalisacion y tur loke a cualifica Siglo 20 revolucionario.
Reina Elizabeth II a nace 6 di Februari 1926 y na e momento no por a realisa e tarea grandi cu tabata spera su persona for di momento cu el a wordo proclama Reina.
Setenta aña largo e mester a dirigi e mundo cu Gueranan Mundial a laga atras pero tambe un mundo cu kier a deshaci di tur tradicion.
Colonianan a bira paisnan independiente despues di revolucionnan rond mundo. Na 1931 Common Wealth, consistiendo pa un gran parti di teritorionan bieu di e Imperio Britanico a wordo introduci.
Te awe exigencianan nobo ta keda presenta como reto pa un futuro insigur den un mundo di pensamentonan den cual historia y deseo pa futuro mester topa.
Un encargo grandi a spera Reina Elizabeth II, cu tambe ta e Gobernador Supremo di Iglesia di Inglatera, sin duda un pais unico atrabez di historia y te awe.
“Rule Britannia, Britannia ta goberna e olanan” a keda e canto di un pais cu Su Mahestad Elizabeth II como Reina, cu tabata por a conta cu e apoyo grandi di su esposo Principe Philip tanto como Reina y como mama di yiunan cu a nace den un epoca nobo.
E generacion cu a nace despues di guera, a haci lama mundial sumamente peligroso y dificil pa lidernan, cu un bida cu tele comunicacion a duna un contenido nobo.
Casnan Real, cu atrabez di historia por a conta semper cu cierto proteccion den exposicion publico, a bira uno di e fuentenan mas importante y atractivo pa periodismo moderno.
Escandalonan tabata un fuente nobo di noticia sigur di di publicacionnan cu tabata depende di escandalo pa bende.
Reino Uni sigur no a scapa di e tendencia cu a bira uno di e retonan grandi cu Reina Elizabeth II, mester a confronta den su bida.
Ta hustamente e hamber mundial pa sensacion, a haci cu Su Mahestad Reina Elizabeth II a destaca ora problemanan serio mester a wordo enfrenta.
Matrimonio di su ruman muher, morto di Princesa Diana, mencion di su yiu homber den escandalo mundial y e segundo matrimonio di su yiu, Charles cu for di ayera tin e titulo di Rey, sigur ta bini dilanti riba e lista largo di momentonan dificil cu Reina Elizabeth II mester a enfrenta.
Ora Covid-19 a ataca mundo, Reina Elizabeth a entrega mundo su formula di forsa. “Fe,” ta e palabra cu el a laga atras como herencia pa sigui nabega den e lama mas bruto cu condicionnan di bida por presenta.
Ayera su salida di e mundo aki a bira e noticia grandi.
Awor kico? Awe mundo mester duna contesta despues cu Reina Elizabeth II a despedi y Rey Charles III a habri un epoca nobo pa un Reino den un mundo di futuro insigur.
