Reconocimiento pa lidernan di padvindsters di Theresia Groep 2

ORANJESTAD (AAN): Nan a haya un bunita reconocemento!  Pabien!

   Receintemente a tuma lugar na residencia Farro-Winterdal na San Nicolas un anochi di reconocimento na e lidernan di padvinderij cu den pasado a forma parti di e prome grupo di Theresia 2.

   Ta trata aki di ‘Lameta’ Crusita Schel, ‘Lioka’ Margarita Winterdal y ‘Oebie Greta’ Greta Leong. Loke mester a bira un anochi di charla, a bira un anochi di sorpresa pa e lidernan. Hasta un ex-padvindster cu ta recidencia na Curaçao bin Aruba specialmente pa e ocasion aki. Tabata un anochi placentero unda cu e ex-padvindsternan a rebiba e dushi momentonan cu nan a comparti hunto den e mundo di Padvinderij.

   Bunita recuerdonan a bin dilanti como tambe e aprecio y cariño grandi cu nan ta sinti pa nan lidernan cu a yuda nan grandemente den nan formacion como ser humano. E lidernan a keda sumamente impresiona di e bunita palabranan di e padvindstersnan. Durante di e anochi tabatin exposicion di portret, persentacion di PowerPoint y competencia entre grupo no por a keda afor. Dos grupo a competi contra riba diferente tereno di padvinderij e.o. yell, traha konopi, nificacion di e nomber di e lidernan.

   E lidernan ta hopi contento y satisfecho di mira cu e simiya cu nan a planta añanan atras den e ex-padvindsternan tabatin su fruto.  E ex-padvindsternan a desaroya y bira damanan cu un fundeshi firme pa e trabao cu nan ta desplega den nos comunidad.

   Un palabra di agradecimento ta bay na e padvindsternan di e prome grupo di Theresia dos, Anecy Toussaint, Jacky Toussaint, Marline Croes, Maurine Croes, Iris Wever, Naomi Vrolijk, Abigail Vrolijk, Sabrina Geerman, Natasha Duntlow, Jessica Jacobino, Nathalie Winterdal y Mirscha Winterdal.

   Un danki ta bay na e padvindstersnan cu a tuma nan tempo pa honra e lidernan di e prome grupo di padvindsters Lameta, Lioka, Leneva (Maria Maduro qepd) y tambe na e lider di kabouternan Oebie Greta.  Sigur e lidernan ta hopi orguyoso di nan tur.