Reclassering ta esencial pa yuda esnan cu a cay reintegra den comunidad

ORANJESTAD (AAN):  Parlamentario Alvin Molina, tabata un di e invitadonan durante un ceremonia di celebracion di Stichting Reclassering en Jeugdbescherming Aruba unda cu a lansa e logo nobo.

Stichting Reclassering en Jeugdbescherming Aruba a wordo funda na 1961.

            Na final Alvin Molina, di fraccion di MEP, a felicita e directora Seraida Pemberton y henter su team pa e bunita trabou cu nan ta haci pa e comunidad di Aruba. E stichting aki y su team di profesionalnan ta traha den background, pero ta brinda un ayudo grandi na esnan den comunidad cu a comete un error y haya nan mes envolví di un forma of otro cu husticia. Stichting Reclassering en Jeugdbescherming Aruba ta yuda preveni pa e hobenan no sigui comete actonan penal, pa comunidad sigur esaki ta un beneficio, unda menos hoben ta comete actopnan penal nos lo por tin un miho Aruba. 

            E profesionalnan hopi biaha no ta den bista di e pueblo, pero nan trabou ta esencial pa comunidad. Nan ta traha cu e hendenan sin importa nan edad, raza, religión of descendencia. Simplemente nan ta saca un man, manera nan logo ta mustra, pa yuda pone nan bek riba e bon caminda pa nan ta un assett pa comunidad. Nan ta yuda e clientenan reintegra den comunidad di un forma positivo y productivo.

            Como Polis di profesion,  ta comprende y ta consciente di tur loke e Departamento aki ta haci pa Aruba. Nan ta saca un man pa e grupo cu a cay, ta prepara pa nan ta bon prepara pa bolbe den nan bida diario. 

            Durante e ceremonia Reclassering a presenta e logo nobo, unda cu e mannan ta e unico elemento cu a keda di e logo anterior cu ta data di 1961, tempo cu e institucion aki a wordo funda. E mannan a keda pasobra e ta simboliza e.o. guía cu nan ta brinda pero alabes ta un seña cu e reintegracion mester bin di ambos banda. E diferente colornan ta refleha di diversidad di nan clientenan di reclassering.

            Molina ta felicita henter e staff y a expresa su gradicimento na cada un pa e bunita trabou cu nan ta haci pa comunidad. Tambe a combersa cu diferente funcionario pa mira con nan di Parlamento por yuda cu e hermentnan cu Reclassering mester pa sigui modernisa nan sistema di operacion y servicio na comunidad.