Directora Seraida Pemberton:
ORANJESTAD (AAN) Directora di Reclassering, Seraida Pemberton-Leonard, a declara den entrevista cu Matutino DIARIO, cu na momento cu un persona wordo referi na Reclassering pa su programa “Manehando bao di influencia” (MBI), dirigi precisamente na personanan cu ta haya nan mes den problema cu husticia, pa motibo di maneha bao influencia di alcohol.
“E ta un programa cu Reclassering ta ofreciendo na e grupo aki, pa concientiza nan riba nan comportacion, di dicidi di bay core tras di stuur, core auto bao influencia”, Pemberton a relata.
E programa aki Reclassering ta draai’e alomenos cuater biaha pa luna, den sentido cu un promedio di mas of menos 200 hende pa aña, ta bin cerca nos of ta wordo pa wordo manda door di ministerio, pa haci e programa.
“Na momento cu bo supla riba e limite legal, Huez ta tuma e decision pa pone bo bao reclassering, pa haci e programa.
Tin diferente combinacion. Bo ta haya un boet, por ta nan ta kita bo rijbewijs, pero e parti aki ta esencial y nos ta haya cu e hendenan mester haci’e, pa concientiza nan riba e comportacion y consecuencianan di tuma e decision di bay core auto bao influencia”, señora Pemberton a reitera.
Ora un hende causa un accidente cu consecuencianan fatal, e acusacion ta bira otro, señora Pemberton a splica. “Hueznan ta evalua e situacion y nan por tuma e decision y por pon’e bao guia di Reclassering y si nos sa cu tin di haber cu maneho di auto bao influencia di alcohol of otro substancia, nos mes por pon’e riba e programa. Pero esun cu Huez manda hende pa MBI ta na momento cu bo stuur bao influencia, polis para bo y bo supla” el a recalca.
Señora Pemberton a indica cu tin hende ta pensa cu e persona mester ta burachi pa polis stop’e y mande reclassering. “Pero no ta solamente esun cu ta burachi, ta e hecho cu bo a consumi alcohol y bo a supla y bo ta riba e limite legal. Anto, esey no kiermen cu bo ta burachi, sino cu bo ta bao influencia”, directora di Reclassering a aclarea.
El a menciona tambe cu e programa ta pa personanan di 18 aña bay ariba. E hobennan ta haya algo otro.
E edadnan di e personanan cu ta causa accidente pa core bao di influencia ta varia. “E ta un combinacion, tin adultonan di edad halto y tin basta jong tambe.Pero mayoria ta di edadnan di 30 aña bay ariba. Durante transcurso di añanan Reclassering ta keda promove su programanan. Nos ta pone hopi enfasis riba e diferente programanan cu nos tin, anto esaki ta uno cu nos ta trece dilanti cu nos ta bezig cu ne. E ta un programa cu, structuralmente, nos tin basta aña ta haciendo’e, pues no ta un programa nobo. Pero enberdad awo tin hopi enfasis riba esaki cu hendenan ta coriendo bao influencia, y tin hopi factor ta hunga un rol, no unicamente mester hisa e castigo, pero concientiza e hendenan cu e decision cu bo ta tuma, pa bay tras di stuur ora bo a bebe tin consecuencianan”, señora Seraida Pemberton-Leonard a subraya.
