ORANJESTAD (AAN): Di 10 pa 22 di Juli 2023 Rebecca Roos Productions lo organisa un workshop intensivo di filmamento documental/documentary filmmaking.
Den e dos siman di e workshop, cu ta tuma lugar na Museo Arqueologico Nacional Aruba (MANA), participantenan lo siña tur aspecto di “visual story-telling” (conta storia cu imagen), estilonan di documentario, camera, audio y edita.
Na final di e workshop, door di pone loke ta siña den practica mes ora, e participante lo a siña masha hopi mes di produccion audiovisual, y lo a traha riba un documentario cortico.
E produccionnan final lo wordo presenta na publico riba 22 di juli.
No mester tin bo propio camera pa participa den e workshop, varios ekipo lo ta disponibel pa e participantenan; pero si bo tin bo propio ekipo semper por trec’e y siña us’e mas eficiente. E workshop ta hopi interactivo y ta promove colaboracion, mescos cu ta pasa durante produccionnan audiovisual profesional.
Si bo tin 17 aña of mas por registra pa e workshop. E workshop lo ta interesante y educativo pa e nobato cu kier siña mas di produccion audiovisual of pa e studiante cu ta ripara cu mas y mas mester usa material audiovisual den presentacionnan y tambe pa profesionalnan cu ta atende cu filmamento manera PR & Marketing, wedding videographers y periodista.
E tayer intensivo aki tocante produccion di documentario lo ta e prome den un serie di tayernan cu Rebecca Roos Productions lo organisa y ta un bon base pa e siguientenan, (tambe esunnan cu ta trata ficcion) como cu su enfoke ta riba visual story-telling y colaboracion, dos elemento sin cua no por produci niun produccion audiovisual.
Rebecca Roos ta un cineasta Arubano mas tanto conoci pa su documentarionan pero cu un experencia den un variedad grandi di produccionan audiovisual for di cinema internacional te television en vivo. Roos tambe ta guia varios workshop tocante e “moving image” y produccionnan audiovisual, ambos na Aruba y internacional. Mas notabel ta su colaboracion cu e famoso Escuela Internacional de Cine y Television, EICTV, na Cuba.
