ORANJESTAD (AAN): Prome Minister Evelyn Wever-Croes ta felicita Minister Geoffrey Wever
cu e logro di yega na un "Memory of Understanding" (MoU) entre Aruba y Curaçao, pa traha hunto y logra resultadonan grandi y positivo pa economia di ambos pais.
Prome Minister a indica cu e laso entre Aruba y Curaçao semper tabata fuerte, y ta importante di por mantene asina. Na 2022, Aruba a importa productonan di Curaçao na un balor di 31 miyon Florin, y a exporta un balor di 10.8 miyon Florin pa Curaçao. Esaki ta muestra cu cooperacion entre dos pais chikito ta instrumental den e crecemento economico di cada pais. E firmamento di e MoU ta e prome paso, mustrando e importancia di cooperacion economico pa logra resultadonan beneficioso pa e comerciantenan y consumidornan.
Cu e MoU aki, Aruba y Curaçao lo traha hunto riba e tereno di comercio y inversion, lo firma e acuerdo bilateral pa stimula comercio liber entre e paisnan, lo explora oportunidadnan di inversion, lo promove desaroyo sostenibel, y lo coopera riba tereno di competencia y proteccion di consumidor.
"E firmamento aki, sigur ta un logro grandi pa Aruba y pa nos isla ruman Curaçao. Mi ta felicita Minister Geoffrey Wever pa su vision y determinacion pa loke ta engrandecemento di economia di pais Aruba. Cu e firmamento aki, Aruba lo tin e oportunidad di florece y duna consumidornan mas escogencia den producto, creando competencia husto pa asina stimula mas comercio, y atrae mas inversion", Prome Minister Evelyn Wever-Croes a expresa.
E firmamento a tuma lugar na Pepe Margo, un cas full restaura den Wilhelminastraat.
