RdA a determina cu e opcion di ‘Tank Farm’ ta e miho posibilidad pa e refineria

Segun Robert Henriquez:

ORANJESTAD (AAN): Refineria di Aruba ta para caba hopi aña y su estado actual ta uno deplorabel. Durante e añanan cu a pasa, diferente intento a wordo haci cu diferente plan pa duna un destino nobo na e area di refineria, como tambe pa crea otro oportunidad economico den sector industrial. Sin embargo, te ainda, ningun di e iniciativanan no a logra materialisa.

   Señor Robert Henriquez di Refineria di Aruba N.V. (RdA) a declara den un entrevista recien cu RdA a haci un inventarisacion completo pa haya un miho bista riba tur loke a wordo propone den pasado y kico ainda ta realistico pa desaroya.

   Segun Henriquez, un di e opcionnan cu mas potencial ta e area di storage. Aunque e seccion aki mester di mantencion, e ta ainda den un estado relativamente miho compara cu otro parti di e compleho.

   E idea ta pa desaroya un ‘Tank Farm’, considerando cu tin hopi compania internacional cu ta haci comercio di crudo (trading) y cu mester luga pa warda e producto riba tera, enbes di den tankinan riba barco na lama, loke ta mucho mas costoso.

   Henriquez a splica cu desde aña pasa, RdA a bin ta trahando riba un plan y a haci investigacion pa determina si tin interes real den e concepto di Tank Farm. El a bisa cu despues di cuminsamento di januari di e aña aki, despues cu Presidente di Venezuela Nicolas Maduro a wordo captura pa Merca, e interes na Aruba a aumenta pa sondea e posibilidadnan pa e refineria.

   Prome cu esaki, tambe tabatin companianan cu a mustra interes pa negocia. Sinembargo, segun Henriquez, pa RdA tabata importante mantene un proceso transparente y duna tur interesado mesun oportunidad, en bes di drenta den un acuerdo directo cu un solo partido, mirando e magnitud di e proyecto.

   “Pa awo te ainda, RdA a determina cu e opcion di storage ta e miho manera pa cuminsa aunke cu e instalacionnan mester di atencion di mantenimento, pero ta mustra cu ainda e tin potencial y bida den dje”, señor Henriquez a duna di conoce.