RBC Royal Bank ta sigui ta e cas di baseball pa Aruba Little League

ORANJESTAD (AAN): “Bon bini na e cas di baseball di Aruba Little League, cu ta RBC Royal Bank”,

asina director di RBC Pierre Rafini a bisa na comienso di un conferencia di prensa, pa anuncia cu un biaha mas e banco ta bay ta patrocinador principal di Aruba Little, manera cu pa 2 decada caba e ta.

“Esaki ta pone nos den un lus hopi positivo cu nos hobennan y ta simbolisa e apoyo di excelencia pa cu e deporte di baseball aki na Aruba”.

E colaboracion di basta tempo entre RBC y Aruba Little League ta un capitulo hopi aprecia den nos historia como banco.

Cu contribucionnan manera esaki den e desaroyo di hubentud y comunidad, nos ta corda e papel importante cu deporte ta hunga, pa loke ta enrikece e bida di hobennan y asina formando nan den e lidernan di mayan, segun Rafini.

El a sigui bisa cu e apoyo di RBC ta demostra tambe cu e banco ta trece bida na su metanan y esey ta pa yuda e clientenan florece, pero tambe pa comunidad prospera.

“Cada ekipo ta sigui inspira nos cu nan dedicacion y trabao di ekipo”.

No laga nos lubida e logronan, unda cu nos tabata tin e campeon regional pa 2024 cu a representa Aruba na World Series di Little League na Williamsport y tambe nos ekipo di Senior Division cu a representa Aruba na North Carolina, segun e director di RBC.

El a duna palabranan di elogio grandi na e fundacion di Aruba Little League, e coachnan, managernan, e boluntarionan, e famianan y e mayornan cu ta sostene e muchanan.