‘Uza piedra, uza droga, ta kita bo paz’
ORANJESTAD (AAN): Desde 2019 131 Aruba a incorpora un Conseho Hubenil den e organisacion. E Conseho Hubenil di 131 Aruba su tarea ta pa primeramente duna conseho solicita y no solicita na e organisacion. Tambe nan ta duna conseho ariba proyectonan di 131 Aruba, prome cu nan ser implementa. E Conseho Hubenil di 131 Aruba ta duna e organisacion un bista cu precision di kico ta tumando lugar bao di mucha y hoben y pakico.
E Conseho Hubenil ta consisti di 5 hoben, mucha muher y mucha homber, entre e edad nan di 11 pa 24 aña. E personal di 131 Aruba ta den contacto estrecho cu e Conseho Hubenil pa asina aki por scucha kico segun nan ta e preocupacionnan y problemanan bao di nos muchanan y hobennan.
Tambe e Conseho Hubenil ta ricibi diferente training como parti di inversion den nan desaroyo y pa nan ricibi mas conocemento di e sector social, salubridad, educacion y husticia. Banda di e trainingnan nan ta bishita diferente instancia pa asina aki haya un mihor bista di kico e instancianan ta haci.
Ariba peticion di e hobenan di e Conseho Hubenil a organisa un momento di informacion cu Raymundo Figaroa di Stichting Hunto. E hobennan di e Conseho Hubenil ta haya cu droga ta mucho facil pa haya y cu uzo di droga bao di nos hobennan ta un problema. Raymundo Figaroa ta labora na Stichting Hunto como ervaringsdeskundige desde 1 juni 2024. Raymundo Figaroa ta un ex adicto y awor ta haci uzo di su conocimento tocante uzo di droga pa asina aki yuda personanan den adiccion pa sali di esaki. Raymundo tin 15 aña liber di droga y kier yuda personanan den adiccion pa tin un mihor bida.
Durante e momento di informacion Raymundo a duna un splicacion di con el a cuminsa cu uzo di droga, ki tipo di droga el a yega di uza y con su bida tawata. Tambe Raymundo a para keto ariba e dañonan cu droga ta haci na un persona y su famia. Con un persona adicto ta pensa y kico ta importante pa un adicto dicidi pa cambia su bida tambe ta temanan cu a ser trata. E hobennan tawatatin diferente pregunta, y Raymundo a duna contesta y conseho positivo na e hobennan.
E Conseho Hubenil a keda masha contento di por a ricibi informacion for di Raymundo. Tambe nan a keda impresiona di scucha con Raymundo a cambia su bida y cu awe e kier yuda personanan den adiccion pa sali di esaki.
131 Aruba kier a gradici Raymundo Figaroa y Stichting Hunto pa e informacion brinda na nos Conseho Hubenil.
