ORANJESTAD (AAN): Siman pasa, e Plataforma PNHSA (Plataforma Nacional Herencia di Sclavitud na Aruba)
a tene un encuentro balioso cu comunidad, na Cas di Cultura.
Un total di 30 participante di comunidad, a scucha con y kico e comienzo di PNHSA ta, loke PNHSA tin como meta y vision, y kendenan ta e grupo di enfoke. Tambe PNHSA a duna splicacion amplio encuanto su structura.
Aworaki e directiva di PNHSA ta consisti di Sirelda Jackson (presidente), Shirley Caine (tesorero v vice-presidente), Marlien Dokman (secretario) y Sonny Richardson miembro di directiva. Tin tres organisashon no- gobernamental (NGO) y tres individuo ta participa.
PNHSA a splica di actividadnan y eventonan cu a tuma lugar den transcurso di un aña y mey, con ta para cu e situacion di aplicacion pa proyectonan di iniciativa social, proyectonan pa y cu gobierno di Aruba y conmemoracion. Tambe PNHSA a divulga tocante nan plan di accion y e puntonan di bista cu diferente stakeholders (entre otro gobierno Hulandes, BZK y gobierno Arubano anterior) ta tuma encuanto e tema di Sclavitud y fondonan disponibel.
Tabatin interaccion ameno y interactivo entre esnan presente cu directiva di PNHSA cu preguntanan, sugerencianan y ideanan. Nan ta gradicido cu presencia di tur cu a participa den e encuentro, y nan tin aprecio enorme pa tur input, recomendacion, y sugerencianan.
Particularmente ta un honor cu un descendiente di Virgina Demetricia a comparti su raiznan cu nan, esta e mesun Virginia Demetricia, naci riba un plantacion Arubano, ta representa resistencia, curashi y resiliencia contra Sclavitud na Aruba. Esaki ta un inspiracion pa tur.
Tambe PNHSA kier expresa aprecio pa Vicky Arens-Tjon A Tjoe, directora di Cas di Cultura pa su colaboracion pa por tene e encuentro den nan localidad. Esnan cu kier tin contacto, haci esaki via email: This email address is being protected from spambots. You need JavaScript enabled to view it.
