Daño ta wordo causa na cierto region di cerebro
LONDON: Un team di investigador lidera pa cientificonan na University of Edinburgh y tameb Jagiellonian University Medical College, pa prome biaha den historia a identifica regionnan specifico den bo cerebo cu ta ricibi daño debi na presion halto di sanger, y por contribui na reduccion di procesonan mental, y desaroya tambe demencia.
E estudio a evalua data combina cu estudionan di MRI di cerebro, analisis genetico, y data observacional di miles di pashent, pa check ki efecto presion halto di sanger tin riba funcion cognitivo.
Tanto Tomas Guzik MD, PhD, kende ta Professor di Cardiovascular Medicine na University of Edinburgh (na Reino Uni), y Jagiellonian University Medical College na Krakow (Polonia) cu a guia e investigacion a bisa: “Door di usa e combinacion aki di imagen, genetica y acercamentonan observacional, nos a identifica partinan specifico di cerebo cu ta wordo afecta ora bo presion di sanger ta subi, incluyendo areanan di bo cerebro yama ‘putamen’ y region specifico di white matter. Nos ta spera cu e descubrimentonan aki por yuda nos desaroya formanan nobo pa trata problemanan cognitivo cerca hendenan cu tin presion halto di sanger.”
Door di studia e gene y proteinanan den e structuranan aki di cerebro, por yuda ciencia compronde con presion halto di sanger ta afecta cerebro y causa problema di memoria. Ademas door di scan e regionnan specifico aki den e cerebro, Docter lo por pronostica kendenan ta bay cuminza perde memoria y sufri di demencia mas rapido den e contexto di presion halto di sanger. Esaki por yuda desaroya remedi mas preciso, cu por crea terapianan mas intensivo pa preveni e desaroyo di perdida di memoria cerca pashentnan cu tin mas riesgo.
Nan a publica nan rapport den European Heart Journal. Ta bon pa corda cu 30% di tur hende rond mundo ta sufri di presion halto di sanger, y cu adicional 30% hayando e malesa. Estudionan ya caba a mustra cu presion halto di sanger por afecta con bon cerebro ta funciona y cu e por causa cambionan di termino largo.
