ORANJESTAD (AAN): E contenido di e rapport di RdA (Refineria di Aruba) a wordo entrega na Parlamento y hopi punto a bira conoci.
Prome Minister Evelyn Wever-Croes a duna di conoce cu Parlamento a pidi e rapport aki y pesey el a wordo entrega na Parlamento. Na mesun momento, RdA mes a entrega e rapport na Ministerio Publico siman pasa. Ministerio Publico awor tin e rapport den su poder y nan ta evalua kico ta e siguiente pasonan pa tuma.
Parlamento a informa Minister Presidente cu nan kier yama un reunion publico riba e tema aki y esaki ta lo ta probablemente e prome mitad di Mei. No lo warda pa despues di eleccion, a remarca.
"Esaki ta algo mucho importante pa bay warda te despues di eleccion", a expresa.
Pueblo mester ta hopi consciente pa ken nan ta bay vota. Ta hopi deroche di placa tabata tin den RdA.
RdA ta un compania cu a haya 21 miyon florin y den 16 luna di tempo nan a gasta 21 miyon florin. Pero di e suma aki, nada a keda atras. Ni placa, ni un edificio, nada, a enfatisa.
Tur e placa a bay na contractnan cu hendenan, hopi dudoso. Bintiun miyon florin a wordo gasta y no tin ningun cuenta cu a wordo duna unda por bisa aki e placa a bay, esaki ta e contract y e descripcion di kico a tuma lugar, e mandatario a señala.
Pesey ta hopi importante pa tur hende scucha kico ta locual a pasa den RdA pa ora bo bay deposita bo voto, bo sa pa ken si y pa ken no vota, Evelyn Wever-Croes a duna di conoce.
