ORANJESTAD (AAN): Na momento cu e formulario di Inkomstenbelasting sali, un pensionado tin cu paga un suma sin reduccion na AZV, pero banda di esaki awor e pensionado tambe mester paga pa haya cierto remedinan.
Con por haci e ora, pa e personanan cu pension no paga dos biaha?
Relaciona cu e pregunta aki haci na Prome Minister Evelyn Wever-Croes durante su programa Live cu Tanchi Eve, e mandatario a bisa cu berdad un pensionado ta paga 'volle pond' di AZV pasobra asina e ley di AZV ta hinca den otro.
A bisa cu a bin toch cu un rebaho riba e prima di AZV pa esnan cu tin un pension so. Nan no ta paga e 'volle pond' pero ta paga un tarifa reduci.
Riba e pregunta, e parti di e remedinan, Wever-Croes a indica cu como Gobierno e ta hopi preocupa pa e decision aki cu desde 1 di April ta cobra pa algun remedinan. El a haya hopi hende cu a bin cerca dje cu preocupacion pa yuda unda cu e por.
Aworaki ta tumando e decision pa mira kico ta bay haci. "Manera cu e ta aworaki e no por continua", a expresa.
E impacto negativo riba cada un di e pashentnan ta grandi y e ta kere cu AZV no a wak esey bon suficiente ora cu a bin cu e medida aki, segun e mandatario.
E medida aki en berdad ta alivia e gastonan den cuido, no asina hopi, pero e problemanan cu esaki ta ocasiona pasobra un hende cu no por pag'e no ta bay haya su remedinan y e situacion ta bay empeora y e gastonan ey ta bira mas hopi mas halto, Premier Wever-Croes a señala.
"Na mi humilde opinion akinan tin un eror cu a wordo cometi den evalua e medida aki y den seno di gobierno nos ta evaluando esaki pa mira kico ta locual cu nos por haci", a bisa.
Evelyn Wever-Croes a laga sa cu e lo anuncia proximamente kico lo bira e solucion structural pa loke ta e tema di remedi y pagamento di remedi.
