MADRID: Polis na Spaña a detene e rapper Saymol Flyly y 36 otro persona mas, di cual mayoria ta di nacionalidad dominicano, pa e explotacion sexual di 10 hoben menor di edad, cu nan tabata obliga pa usa y distribui droga.
E cantante Saymol Flyly cu a wordo aresta, tin mas di 150.000 abonado riba su canal di video di YouTube.
Otro detenido ta un homber ecuatoriano di 65 aña di edad, kende ta wordo acusa di a mata un otro persona na Augustus 2021 na Madrid.
E victimanan awor ta bao proteccion di Gobierno di Madrid. E investigacion mes a cuminza na April pasa, ora cu autoridad a descubri cu un menor di edad a huy for di e centro unda e tabata biba.
Durante su ausencia, e tabata tene relacion sexual cu personanan mayor di edad, a cambio di placa of di droga.
Otro amiganan di e menor aki tambe tabata huy cu e mesun meta.
E integrantenan di e banda criminal tabata contact nan via Social Media, unda ta gana nan confianza y despues tabata usa nan pa ofrece servicio sexual na clientenan cu tabata duna nan droga.
Den algun caso, nan tabata hasta obliga nan pa bay reparti e droga mientras nan ta riba rollerskates, y despues di a entrega e droga, nan tabata wordo abusa sexualmente door di e clientenan mes.
Un di e menornan a keda 3 dia cera den un camber di un cas dedica na narcotrafico den un bario parti zuid di Madrid, unda el a wordo obliga pa prostitui su mes.
Den un momento di descuido, e menor a logra huy y a pidi auxilio na un negoshi, unda a core yama Polis.
Autoridad a logra di identifica tur esnan involucra, den cual tin tres muher tambe, y nan a traha riba un operacion pa detene e resto, usando 150 agente.
Polis a logra confisca droga, arma di candela, machete, placa, y material informatico. Fuera di esey un monton di prueba di yamada telefonico, y video.
Tur esnan deteni, incluyendo e rapper Dominicano, ta wordo acusa di agresion sexual, prostitucion di menornan di edad, pornografia infantil, secuestro, y delito contra salud publico.
