MERIDA: Pa 40 siman largo, e muher Ninfa Lucía Romero Irausquin di 49 aña di edad, a actua comosifuera e ta na estado.
Finalmente el a hunga comedia bisando cu el a wordo secuestra den un Ambulans unda nan a horta su supuesto baby. Esaki a socede na ciudad di Merida.
El a bisa cu atardi ora e tabata riba ‘Viaducto la 26’ di e ciudad, y diripiente el a sinti su mes malo. El a conta cu aki ta unda un Ambulans a stop, y el a wordo yuda pa algun paramedico, kendenan a dicidi cu nan tin di bay cune. Nan a hibe den e Ambulans.
Segun Ninfa Irausquin a bisa, contra su boluntad coriendo den e Ambulans, nan a dune remedi y el a bay for di tino. Despues el a spierta na lugar desconoci (sin duda dato concreto), y a bin ripara cu e no tin su baby mas den barica.
El a bati alarma na Polis, y aki a pone detectivenan di Cicpc Merida cuminza investiga. Prome cos cu nan a haci, ta analisa e smartphone di e muher, y a check data di e compania di telefon, pa mira si acaso enberdad riba e Diaranson atardi ey e tabata den e area di Viaducto la 26, danki na triangulacion di señalnan di cellular.
Mientras tanto a haci un examen medico, y tur test y observacion cu Ginecologo a haci, a determina cu e muher aki nunca tabata na estado.
Cu tur e detayenan aki, detectivenan di Cicpc a consulta cu Fiscal, y mesora Ministerio Publico a duna ordo pa e wordo deteni.
E muher Irausquin awor ta deteni, y a bin haya sa cu aparentemente el a gaña pa 40 siman largo cu e ta na estado, djis pa su casa no bay lage. Esey ta debi cu e no por a dune un yiu.
