Diadomingo 25 awo di 8’or am te 1’or pm:
ORANJESTAD (AAN)—Desde varios dia caba Santa Rosa ta planeando su mercado, ya cu e demanda pa esaki ta sumamente grandi. Den un entrevista cu Randy Maduro, funcionario di LVV (Departamento di Agricultura, Cria y Pesca) a menciona cu debi na Covid-19 durante dos aña no por a organiza e mercado Santa Rosa, pero aworaki nan a ranca sali bek cune, pero un tiki mas trankilo y simple.
E ta bay wordo teni den e area frutal cu ubica patras pero no e custumber cu tabata tin di hacie dilanti e edificio nobo of parkingloot dilanti, sino den e parti di fruta unda ta mas fresco y berde.
Ya caba tin mas of menos 40 participante di diferente productor, pa domingo awo 25 di September, y specialmente na prijsnan cu ta fit den e consumidornan nan cartera, pa asina por yega di 8 or di mainta te 1 or di merdia, y disfruta di tur locual ta bay tin.
Ta bay tin cuminda crioyo, pisca y carni fresco, fruta, berdura, pica, coi dushi, entre otro.
Maduro a extende un invitacion na pueblo di Aruba pa bin pasa un mainta familiar hopi agradable, unda ademas di prijsnan economico, lo tin bon musica pa anima e mercado, y nan ta expect un publico basta grandi. Asina ta cu yega trempan! Santa Rosa so por ofrece e mercado familiar aki.
