Jesseline Kelly, PR di DAS:
ORANJESTAD (AAN) – Jesseline Kelly, Relacionista Publico di Departamento di Asunto Social (DAS), a referi den un entrevista tocante nan servicio di “Guia Social”.
“Nos servicio di Guia Social ta consisti di Trahador Social, Trahador pa Hubentud, y Trahador na Bienestar. Si mi mester bisa pakico un cliente ta acerca un Trahador social, ta pasobra e cliente, entre otro, por tin problemanan financiero, problema di comunicacion entre famia, entre bisiña, cu vivienda, cu su pareha; anto, kico e tarea di un trahador social ta? Un trahador social ta traha un plan di guia cu e cliente. E ta duna conseho, sosten, e ta yuda e cliente compronde su situacion pa asina e cliente por saca su mes for di e situacion ey.
Loke a bal nos up, durante e ultimo lunanan, ta cu famianan ta hayando trabao pero e problema ta sinta cu nan no por maneha nan entrada. Dus, hopi famia ta acudi cerca nos akinan pa un guia con pa siña maneha nan entrada anto, naturalmente, despues di un tempo cu bo no a maneha bo entrada, tin problemanan cu ta bin cune, entre otro: atraso di huur, atraso cu utilidad, e placa no ta yega pa nan por come manera mester ta na cas, tin biaha e no ta yega tampoco pa paga crèche, cuido di e muchanan, vooral cerca mayornan soltero”, Jesseline Kelly a relata.
Pues, esaki ta e ayudo mas grandi cu DAS ta duna nan durante e ultimo lunanan.
