‘Eight to Eight because our planet can’t wait
ORANJESTAD (AAN): Nos Planeta Tera, cu tur su habitantenan, tanto especie humano, animal, vegetal y micro-organismo ta bao presion extremo, confrontando multiple menaza. Cambio climatico, subida di nivel di laman, desertificacion y escasez di awa dushi, perdida di tereno pa agricultura, polucion di oceano, y alaves aumento di maleza resistente na antibiotico, un cantidad creciente di maleza cu ta pasa di animal y insecto pa ser humano a consecuencia di perdida di habitat, degradacion di ecosistema, un alarmante cantidad di ecosistema vital cu ta desaparece y especienan birando extincto debi na actividad humano.
Economia global y economianan nacional apenas a cuminza recupera di e devastador impactonan di e pandemia di COVID-19, cual a drasticamente reduci e capacidad di hopi nacion pa reboot y crece nan economia pa crea cupo di trabao nobo, provee servicio basico pa ciudadania, reduci pobreza, mehora infrastructura nacional pa salud, y crea condicionan mediante educacion, innovacion, ciencia y tecnologia pa diversifica economia, cu resiliencia incorpora, y e capacidad pa cumpli cu e Obhetivonan di Desaroyo Sostenibel y fiha metanan pa reduccion di gasnan invernadero.
E conflicto na Ucrania a crea problema nobo di un severo escasez di recurso energetico di combustibel fosil, pa un masivo ola di refugiado, y un creciente falta di producto basico di agricultura acopla na un rapido aumento di prijs pa producto basico agricola riba mercado internacional, resultando di e caida den exportacion (di ingrediente pa) fertilizante y exportacion di producto manera trigo, cereal y azeta comestibel, di cual Ucrania y Russia ta exportador grandi riba mercado internacional.
Hasta tur industria cu ta usa microchips den nan producto a keda impacta pa e guerra na Ucrania..
Tur esaki ta causando atraso serio den cumplimento cu metanan pa combati cambio climatico, e Obhetivonan pa Desaroyo Sostenibel, y proteccion mundialmente di biodiversidad y ecosistema, di cual ultimo algun ta vital pa nos seguridad alimentario y salud global.
Segun e grupo local di Rainbow Warriors International, lamentablemente nos planeta no por warda mas, pasobra si ser humano tarda pa cumpli cu deadline urgente, lo ta demasiado laat pa scapa Planeta Tera.
Nacionnan Uni y Earth Day Network pa 2022 a scoge e tema “Inverti Den Nos Planeta” pa Dia di (Mama) Tera, pa enfatiza e necesidad pa pone tur hende, sector priva y gobierno en particular participa cu tempo, recurso y esfuerzo pa salba Planeta Tera.
Dia di (Mama) Tera no ta suficiente, y pesey Rainbow Warriors Core Foundation a crea un campaña nobo cu ta corre di April 8 te cu Juni 8, yama “Eight to Eight, Because Our Planet Can’t Wait”.
Enfoque y showcase pa islanan chikito den desaroyo: Na Aruba, Universidad di Aruba tin un facultad unico yama SISSTEM, cu e meta pa crea “Smaill Island Solutions through Science, Technology, Engineering and Mathematics”,sosteni pa un colaboracion cu Universidad di Leuven (Louvain/Lovaina) na Belgica financia cu fondonan di Union Europeo.
Aruba tambe tin un mescla unico di fundacion pa investigacion cientifico, un cantidad di inicitiava pa citizens’ science y innovacion, tecnologia agricola y un monton di proyecto di energia solar y di biento.
Esaki, den combinacion cu nos lazonan cu Union Europeo atravez di Reino Holandes ta haci Aruba excepcionalmente califica pa demonstra esfuerzo y tecnologianan pa resolve problemanan cu islanan chikito den desaroyo ta enfrentando, pero tambe pa traduci e solucionan aki pa uso global.
Eight to eight, because our planet can’t wait: E campaña aki ta corre annualmente di April 8, te cu Juni 8. E tin un triple enfoque.
Decadanan internacional y di Nacionnan Uni: Lo cubri e tematicanan di lo siguiente: (*) Decada Internacional Di Lenguanan Indigena (2022-2032). (*) Decada di Nacionnan Uni pa Envehecimento Saludabel (2021-2030). (*) Decada di Nacionnan Uni pa Restoracion di Ecosistema (2021-2030). (*) Decada di Nacionnan Uni di Ciencia Oceanico pa Desaroyo Sostenibel (2021-2030). (*) Decada di Nacionnan Uni di Agricultura Familiar (Cunucu, agricultura escala chikito) (2019-2028). (*) Decada Internacional pa Accion “Awa Dushi pa Desaroyo Sostenibel” (2018-2028). (*) Decada di Nacionnan Uni di Accion pa Nutricion (2016-2025). (*) Decada di Nacionnan Uni di Energia Sostenibel pa Un y Tur (2014-2024).
Añanan internacional: Pa esaki lo bay destaca: (*) Aña Internacional di Ciencianan Basico pa Desaroyo Sostenibel (2022). (*) Aña Internacional di Pesca y Acuacultura Artesanal (2022).
Dianan internacional: Pa esaki lo bay destaca: (*) Dia Internacional di Vuelonan Espacial Tripula, April 12. (*) Dia Mundial di Creatividad y Innovacion, April 21. Dia di (Mama) Tera, April 22. (*) Dia Mundial di Buki y Derecho di Autor, April 23. (*) Dia Mundial pa Seguridad y Salud na Trabao, April 28. (*) Dia Mundial pa Libertad di Prensa, Mei 3. (*) Dia Mundial di Parha Migratorio, Mei 14. Dia Mundial di Telecomunicacion y Sociedad di Informacion. Mei 17. (*) Dia Mundial di Abeja, Mei 20. (*) Dia Mundial pa Diversidad Biologico, Mei 22. (*) Dia Mundial di Bicicleta, Juni 3. (*) Dia Mundial di Medio Ambiente, Dia Mundial pa Combati Pesca Ilegal, No Raporta y No Regula, Juni 5. (*) Dia Mundial di Seguridad den Preparacion/Produccion di Cuminda, Juni 7. (*) Dia Mundial di Oceano, Juni 8.
Formato di e campaña: E campana aki lo probecha di tur tecnologia existente di medionan di comunicacion y medionan social y lo utiliza “story telling”, esta den forma di un narracion continuo toca riba diferente tema, y tambe atraves di comunicado di prensa, fact sheets, medionan interactivo, video y entrevista graba pa Facebook y YouTube, blogs, websites informa y inspira publico en general tocante tur e temanan pa motiva un y tur pa cuminza pone man na obra pa desaroyo sostenibel na Aruba.
Pa enfoca kico ta ser haci na Aruba nos lo provee video cortico pa pone riba Facebook y YouTube.
Fact sheets, tool kits y materialnan di informacion lo ser haci disponibel riba Internet, y nos ta haci esfuerzonan pa haya cobertura den medionan imprimi den forma di entrevista y articulo.
