Mervin Wyatt-Ras splicando debi na e ley di BBO di 7% na Frontera
ORANJESTAD (AAN): Riba Diaranson den Parlamento a keda trata otro medida di Gabinete Wever Croes.
Ta trata di e asina yama Landsverordening Belastingsplan 2023 parti 2. Den e ley aki ta reglamenta 7% BBO na frontera.
Na comienso tabatin pleitamento den coalicion pa exigencia di fraccion di RAIZ pa cumpli cu nan mocion y a tarda pa habri e reunion. A cambia orario pa 10.30 pa despues a inicia reunion despues di 11 or. Aki ta desvia di reglamento di orde articulo 26. Pero ya cu e Presidente di Parlamento aki tur cos por. Pues e reunion a sigui aunke e ta ilegal.
Ta falta di respect cu Presidente di Parlamento no tabata dispuesto di duna oportunidad di skucha gremionan sindical, ni OPPA, ni juweliers pa por skucha nan punto di bista.
Na aña 2018 gobierno aki a hisa BAZV di 2 pa 3 %. A introduci BAVP na 1.5%. Cu BBO di 1.5% tabata total 6%. E aña aki a hisa BBO di 1.5 pa 2.5%. En total ta 7%. Tambe di 9.5 pa12.5% di Toeristenheffing. A cobra 250 miyon Florin pa aña y den e ultimo añanan mas o menos 1.5 biyon Florin a ricibi na entrada di tur e medidanan. Pregunta cu a haci ta na unda tur e ingresonan a bay?
Raad van Advies ta cuestiona cu gobierno ta introduci hopi impuesto indirecto. Tur ta heffingen dirigi riba consumptie. Pues dirigi riba e consumidor, dirigi pues riba nos pueblo.
Dor di e BBO na frontera bedrijfskosten di negoshinan lo subi y nos pueblo pues lo ser confronta cu efecto di subida di prijs. E comerciante lo tin perdida tambe. Esaki lo por conduci na retiro di empleado.
Den e ley gobierno no ta indica con grandi e consecuencianan lo ta pa e poder di compra di nos ciudadanonan. E poder di compra cu ya awe ta abou lo baha mas ainda. Hecho ta cu e placa cu nos ciudadanonan tin den nan cartera no ta yega pa nada. Pa mesun cantidad di placa ta haya menos producto y tin mas gasto. Ya caba tin inflacion halto y esaki lo subi mas.
Gobierno no ta pensa riba mamanan cu no por cumpra carni ni sikkere carni bleki, hasta webo a bira caro. Gobierno no ta pensa riba cantidad di meter di coriente y awa cu ta ser sera? Gobierno no ta pensa riba cantidad di casnan cu a ser kita for di ciudadano no cu no por paga nan debenan paso nan a perde trabao of tin un trabao cu pago abou? Gobierno no ta pensa riba tatanan cu tin cu falta trabao paso no tin gasolin y ta prefera pa usa e gasolin pa mama hiba yiu school?
Gobierno no ta pensa riba mayornan cu no por paga schoolgeld y ta tende di hoofd cu nan yiu no por bay cine paso no a paga schoolgeld y no por haya rapport paso no a paga schoolgeld? Gobierno no ta pensa riba e mayor cu tin cu fia placa pa hinca di su mes den mas debe of ta bay buske otro caminda, pa por cumpli cu su famia?
Por constata cu problemanan financiero ta trece cu nan stress, depresion y problemanan psychosocial, ademas problemanan di salud mental.
Gobierno no ta pensa riba nos grandinan cu no por paga na remedinan ta laga dolor di stoma bira mas fuerte pa nan por paga pa pilder cu tur consecuencia di esaki?
Gobierno no ta pensa riba mayornan di muchanan cu no por paga pa medicina y ta postpone tratamento di malesa di nan yiu di cual e gastonan a lo largo di cuido medico lo eleva. Awendia ni por come saludable door cu prijs di fruta y verdura ta impagabel.
Por bisa cu gobierno ta keda chica pueblo y tin un expresion: “van een kale kip kun je niet meer plukken.
Minister den su contestanan ta manda tur hende subi facebook pa keda ora nan prijsnan subi.
Y un djies ora comerciantenan cuminsa kita empleadonan foi trabao, unda nan mester bay? Wel nan mester bay cerca minister na su cas. Paso loke CFT, Raad van Advies y comercio ta indica cu gobierno no ta baha su propio gastonan. Esaki nan ta keda sky high.
