ORANJESTAD (AAN) – Juffrouw Joselyne Oduber, cabesante di Emmaschool a baha cu pensioen, por cierto hopi mereci despues di tanto aña como docente y cabesante, y docentenan,
alumno y ex-alunonan a organiza un despedida p’e, cu por cierto el a pidi pa no haci mucho “fanfare”, pero hopi amor semper ta bon bini cerca dje. No obstante, e muestranan di cariño pa Juffrouw Joselyne a resona masha.
El a expresa cu e despedida aki ta hopi bunita, pero e no ta solamente pa su persona, pero nan ta bay compartie cu Juffrouwnan Quetica Arends y Lilian Gil, cu tambe a traha hopi aña na scol hunto cune. El a menciona tambe Juffrouw Olivia, cu ta su role model, y hunto nan a carga e solo cu henter e team.
“Mi tabata tin algo prepara pero nan a bisa mi pa mi no papia hopi awe, pero na lugar di boso bisa mi danki, ami ta bisa boso danki, pa tur e añanan cu boso a traha hunto cu mi, carga e solo, siña nos muchanan tur dia mainta, traha tur e lesnan pasobra nos ta cuminza di chikito bay te grandi. Anto awe, nos ta mira con dushi nos mainta ta bay ta”, Juffrouw Joselyne a expresa.
El a gradici si, tur esnan cu a contribui pa e recuerdo bunita cu e ta bay cune. El a haya e sorpresa di e presencia di Juffrouw Maybelline, su maestra di musica, cu a siñe toca su guitara, y dune hopi inspiracion pa guia coro, y canta cune pa hopi aña tambe, entre otro, na Festival OTI y diferente cos cu el a pushe pa haci. Juffrouw Joselyne a worde bisa cu e sorpresa cu el a haya di un grupo di jazz pe, ta completamente di su ex-alumnonan cu ora nan a tende cu Juffrouw Joselyne ta baha cu pensioen nan a forma un grupo, topa otro y bin cu e idea aki completamente di nan mes.
{gallery}Juffrouw Joselyne Oduber, cabesante di Emmaschool, a baha cu pension cu tremendo despedida{/gallery}
