Quota International of Aruba a organisa “Male Care Day” na Stichting Eliezer

ORANJESTAD (AAN): Quota International of Aruba a organisa un actividad special “Male Care Day” na Stichting Eliezer,

un centro di rehabilitacion, cu e meta di brinda atencion, cuido personal y alegria na esnan cu ta ricibi tratamento eynan.

Durante e actividad, 21 cliente a disfruta di un experiencia unico di self-care danki na e colaboracion di S T A S H Barberia. Cada participante a ricibi servicio profesional manera pela cabei, feita, scrub pa cara, crema hidratante y facial mist. 

Ademas di e tratamentonan di cuido personal, e clientenan a disfruta di snacks y iced tea den un ambiente agradabel y amistoso. Pa completa e dia special, cada participante a ricibi un Self-Care Goody Bag como muestra di aprecio y motivacion pa continua cu nan cuido personal. 

E reaccion di e clientenan tabata hopi positivo. Nan a expresa nan gratitud pa e atencion special cu nan a ricibi. 

Quota International of Aruba ta gradici Stichting Eliezer y S T A S H Barberia pa nan colaboracion y apoyo pa haci e iniciativa aki posibel. Actividadnan manera esaki ta reafirma e importancia di dignidad, autoestima y conexion humano den nos comunidad.