Quota International of Aruba a instala su di 36 directiva

ORANJESTAD (AAN): Recientemente a tuma luga instalacion di e directiva nobo  di Quota International of Aruba  pa e periodo di 2022-2023.

Esaki ta e di 36 Directiva pa Quota International of Aruba. Dia 29 mei 2022 ta conmemora cu 35 aña pasa Quota International di Aruba a wordo funda.

            Maestra di ceremonia tabata Quotarian Isabel Dammers, Quotarian y Past International President Enid Croes-Marugg a cende e bela di instalacion, Quotarian Monique Giel-Labad a presenta e invocacion y Quotarian y Past President Annemieke Dijkhout a conduci e ceremonia di instalacion.

            Presidente saliente Farida Feliciana-Figaroa a gradici e directiva di periodo 2021-2022 pa nan bon trabou y tambe a duna un relato di e logronan y servicio duna na e comunidad di Aruba apesar cu e aña tawata un aña dificil debi na Covid y no por a haci ningun actividad pa recauda fondo. Asina mes Quota International of Aruba a logra haci donacion na 12 instancia na Aruba pa un suma total di AWG 35,000.

            Tur esaki tabata posibel danki na e contribucion personal di e miembronan di Quota. Tambe a gradici tur Quotarian cu a yuda y apoya durante aña.  

            E directiva nobo pa Quota International of Aruba pa e aña 2021-2022 ta lo siguiente:

Luzina de Greef-Mattemaker, Presidente; Phyllis Simon, Vice-Presidente y Secretary; Ann Brinkman, Tesorera; Ludmilla Arends, Directora di Desaroyo y Crecemento; Gladys Kock, Directora di Servicio.

            Luzina de Greef-Matemaker den su discurso como Presidente nobo a gradici tur Quotarians cu aña den y aña afo ta dedica na sirbi nos comunidad cu amor y pasion.

            Luzina a elabora riba e cambionan cu Quota Aruba ta pasando aden, manera modernisacion di e reglanan y e manera cu Quota ta organisa. Tambe a enfoca ariba e importancia di servicio na nos comunidad y cu hopi energia y animo lo sigi cu e trabou cu Quota tin ta haciendo pa 35 aña.

            Quota International of Aruba ta un organisacion boluntario di  ehecutivonan femenino y cu ta dedica na mehora calidad di bida di esnan menos fortuna den nos comunidad, specialmente esnan cu problema di oido y habla y tambe ta sostene hopi programa pa hende muhenan den dificultad y muchanan desafortuna.