Olivier Vieira di Qredits, partner di YeS:
ORANJESTAD (AAN) – Olivier Vieira, Risk Manager di Qredits, como partner tambe a participa den e conferencia di prensa yama pa Minister di Economia Geoffrey Wever, tocante e “Youth Entrepreneur Summit” (YeS) dirigi na e hobennan di, principalmente, San Nicolas.
Vieira a mustra su mes contento di a mira tanto partnernan sinta na mesa pa coopera cu e programa aki, pasobra e ta mire no solamente como un evento hopi importante, sino como algo cu tin mester.
El a bisa cu como compania cu ta enfoca riba tereno financiero di Aruba, nan ta mira y realiza, cu e potencial ta hinca den e hobennan, y cu nan ta e futuro di Aruba.
“Nos ta encurasha y support e idea aki, y tambe nos tey pa comparti nos experticionan, y nos ta support nos muchanan pa nan bay dilanti. Complementario na esaki, tambe nos ta mira esaki como un ‘check off’ pasobra e aña aki tambe nos ta trahando cu Ministerio di Economia, pa introduci nos ‘Small Business Academy’ y tambe nos Be Your Own Boss Program’ hunto cu e ministerio”, Vieira a menciona.
Nan ta mira e youth summit como algo structural pa yuda no solamente e hobennan pero tambe e adultonan local.
