Na un momento cu economia mundial ta den traspaso importante --- *Youth Entrepreneur Summit un paso hopi importante pa Aruba --- *E ingrediente cu no por reemplasa den negoshi y e mundo di mañan
ORANJESTAD (AAN) — Cu hopi interes nos a tuma nota di e Youth Entrepreneur Summit cu ta crea un aliento nobo cu nos comunidad mester.
Mundialmente e efectonan di Covid-19 sigui pa e Guera na Ukraine, segun expertonan tin impacto riba hende y ta kibra animo di hende pa traha riba asuntonan positivo.
E grupo cu mas ta sinti e problemanan serio pa enfrenta futuro, ta hobennan cu ta e personanan cu ta e brug entre e Aruba di awe y e Aruba den futuro.
E negociantenan cu tin e base comercial y asina economico, financiero y social di un pais den nan man.
Cada temporada den historia a produci su propio exigencianan na comerciantenan mundialmente.
Tin cierto exigencianan cu nunca ta cambia pa un bon entrepreneur, negociante, cu mester di e curashi pa crusa lama pa descubri teritorio nobo pa haci negoshi of cu mester confronta olanan pa pisca y asina haya producto pa e bende ora e bolbe tera.
Con presenta un producto? Con crea un circulo di cliente satisfecho y asina fiel na e empresa?
Mundo moderno a duna nomber nobo na e esencia di comercio pero tambe a introduci diferente tipo di estudio, cu ta prepara e hoben pa prepara su mes pa por actua como un empresario di su propio negoshi of dirigente di negoshinan cu ta haci uzo di su capacidad.
Den transcurso di tempo, entrega di trabou pa haya entrada, a haya diferente nomber.
E esencia ta keda cu un panadero mester conoce e arte basico di traha pan, pero tambe introduci variacion den pan, pa su producto bende.
E por keda contento cu un produccion di 20 pan pa dia, pero por dicidi cu e ta bay en grande y ta crea su empresa pa entrega di Miles di pan pa dia. E por bira un Captain of Industry riba su tereno.
Na e momentonan aki, mundo ta conoce un situacion cu ta haci cu hende tin menos placa pa gasta. Pues hende ta busca e mihor balor pa su placa cu e ta paga pa un servicio of un producto.
E empresario cu kier tin exito, mester ta na haltura con e ta mantene control riba su entrada y gastonan. E mester por brinda e servicio cu clientela kier.
Tin cantidad di programa di computer cu ta asisti empresa chikito den nan administracion. Tin hopi caminda habri pa e hoben empresario crea su propio brug pa un futuro cu awe ainda ta parce desconoci pero ta exigi producto y trabou di empresarionan.
Nos ta aplaudi e Summit pa Empresarionan Hoben. Nan mester di e sosten pa habri e caminda pa e futuro nobo cu ta spera nos. Exito na tur cu ta subi e brug, caminda pa futuro!
