ORANJESTAD (AAN): Ya ta cuatro aña caba cu Qredits ta estableci na Aruba y yudando varios empresario cuminza cu nan idea pa el a bira realidad.
Den un entrevista cu Oliver Vieira, el a confirma cu nan a logra crece, y obtene varios logro riba e isla aki.
Na comienzo, Qredits tabatin un oficina chikito den edificio di MFA Noord, y despues nan a move pa nan oficina den John G. Emanstraat unda nan a funciona pa como 3 aña. Debi na e crecimento, tabatin mester di mas infrastructura y pa tal motibo a busca un lugar mas espacioso.
Pesey e siman aki, nan a muda y awor ta den nan edificio nobo den Bilderdijkstraat na Playa, unda a crea un oficina estilo di ‘incubador’ pa asina yuda stimula e empresarionan pa tuma e siguiente paso, pa sigui crece, of desaroya nan ideanan.
Qredits a bin ta sostene y stimula e empresarionan, door di duna nan hermentnan unico pa nan traha nan propio plan di negoshi, haya empuhe y hasta duna prestamo te cu 100 mil Florin pa habri negoshi.
Vieira a bisa cu e crecimento a wordo afecta un tiki door di e pandemia, aunke toch di hopi trempan a identifica e necesidad pa core yuda nan clientenan. Pues Qredits no a djis bay para na banda pa mira kico e efectonan lo bay bira. Cu esaki nan a bay hopi pro-activo cu e clientenan y tambe no-cliente a logra ofrece e asina yama ‘overbruggings-crediet’ y esaki a yuda diferente compania wanta e golpinan di e crisis di Coronavirus. Pa asina despues di esey nan por realmente bin bek na e nivel unda nan tabata costumbra di ta.
Aworaki mey-mey di 2021, economia di e isla ta den proceso di recuperacion, y e ta den direccion positivo. Y nan ta mira e resultado di e inversion cu nan a haci den nan comerciantenan di 1, 2, y 3 aña pasa, ta cuminza rindi bek den resultadonan no djis solamente pa loke ta e prestamonan, sino tambe cu e comerciantenan mes por sigui cu nan companianan.
YUDANDO RIBA 250 COMERCIANTE: Den un pregunta na Vieira, pa sa cuanto comerciante local, Qredits a yuda den e 4 añanan, el a splica cu nan a yuda mas cu 250 comerciante local. E total di credito otorga ta riba di 275, segun el a splica.
Ademas di e comerciantenan local cu a yuda cu prestamo, durante 2021 a introduci programanan educacional na tanto Enseñanza pa Empleo como tambe Colegio EPI. Pues awor Qredits ta satisfecho con e programanan aki ta moviendo exitosamente.
“Pues no solamente nos ta yuda comerciantenan actual pasa door di e proceso, pero nos ta preparando comerciantenan di futuro tambe pa tin hermentnan pa deal cu loke ta bin na caminda aworaki,” Oliver Vieira a indica na DIARIO.
