ORANJESTAD (AAN): Prome cu eleccion tuma lugar, Camara di Comercio (KvK) hunto cu Universidad di Aruba (UA),
Tele Aruba y Setar N.V ta bay organiza un debate politico.
Durante un conferencia di prensa rector interino di UA, Mieke de Droog a bisa cu e ta contento con e debate ta bay wordo hinca den otro y transmiti, pasobra ta hopi importante pa publico na un manera conciente por forma nan opinion.
“E debate mester ta uno di calidad y independiente y hunto cu KvK nos por garantiza cu esey ta bay ta e caso”.
E rol di UA ta pa traha hunto cu KvK riba e forma di e debate y tambe pa locual ta e preguntanan, segun De Droog.
El a sigui bisa cu e studiantenan di diferente facultad a entrega nan preguntanan caba.
Esaki ta bay wordo discuti den e comision di pregunta, mientras cu e pueblo tambe tin e oportunidad pa haci esey via e website di Camara di Comercio y tambe riba social media di Universidad di Aruba.
De Droog pesey ta pidi tur hende interesa pa manda nan topico y preguntanan cu por wordo uza den e debate.
“Asina nos por percura pa boso preguntanan tambe wordo envolvi den e debate”.
E lidernan politico e ora ey ta haya e oportunidad pa duna nan opinion y vision pa futuro di nos pueblo, pa asina tur hende por vota concientemente, segun e rector interino di UA.
