Pueblo di Aruba ta cordialmente invita pa bay apoya nos hobennan den Weganan Interinsular 2024

Na Compleho Deportivo Frans Figaroa na Noord.

ORANJESTAD (AAN): Mandatario di Deporte ta contento di informa cu tur cos ta cla pa ricibi e delegacion di Boneiro y Curaçao cu ta yegando Aruba pa participa den Weganan Interinsular 2024. E competencia escolar ta inicia na Aruba dia 1 di maart pa 9 or di mainta na Compleho Deportivo Frans Figaroa na Noord.

            E fin di siman aki, e scolnan cu a clasifica di Aruba, Boneiro y Curaçao lo competi contra otro den trefbal, dam y ahedres. Weganan Interinsular ta continua na Boneiro den luna di maart y ta clausura den luna di april na Curaçao.

            Na 2023 Weganan Interinsular a inicia bek despues di shete aña. Pa finalisa, Minister Endy Croes ta invita henter Pueblo di Aruba pa bin apoya nos atletanan cu ta competiendo contra Boneiro y Curaçao e fin di siman aki. Cu deseo, dedicacion, determinacion y disciplina ta logra! Hopi exito!