Publico tin di corda cu ta gratis pa uza Zona di Desperdicio na Ecotec

Maikel Gomes di City Inspector

ORANJESTAD (AAN): Bureau City Inspector (BCI), den colaboracion cu Ministerio di Asuntonan General, ta haci un yamada na tur ciudadano di Aruba pa haci uzo di e Zona di Desperdicio na Ecotec, Barcadera. E facilidad ta disponibel desde 1 di juni 2026, di dialuna te diadomingo, entre 7:00 di mainta te 3:00 di atardi.

   Relacionista Publico di BCI, señor Maikel Gomes, a indica cu den e ultimo tempo a keda registra un aumento den kehonan tocante tereno priva, eigendom y tereno di huur cu ta wordo uza ilegalmente pa deposita sushi. Segun e, e practica aki ta prohibi pa ley y ta viola articulo 28 di e Algemene Politieverordening, cu ta stipula cu ningun tereno priva, eigendom, erfpacht of di huur por wordo converti den un luga pa deposita desperdicio.

   “Esaki ta un iniciativa di Gobierno for di un di juni caba pa ful Aruba tira nan sushi gratis na e zona aki. Baki di Bario a wordo cambia pa e Zona di Desperdicio. Pero ta riparabel cu pueblo no a tuma esaki completamente na serio mientras e ta gratis”, señor Gomes a remarca.

   Na e zona oficial di desperdicio por deposita, entre otro, green waste, cardboard, metal, carton, mata, bloki di concreto, tegel, mueblenan y productonan electronico.

   Segun Gomes, tin cierto material cu no ta permiti deposita na e Zona di Desperdicio, manera desperdicio domestico y sanitario, materialnan kimico peligroso, desperdicio medico, material toxico of inflamabel y bestianan morto. E ultimo categoria ta cay bou di responsabilidad di Serlimar.

   BCI ta enfatisa cu e facilidad ta un servicio gratuito pa yuda mantene Aruba limpi y preveni formacion di dumpnan ilegal cu por causa contaminacion, plaganan y situacionnan insigur den bario.

   “Nos ta invita comunidad pa probecha e servicio gratis aki y evita di tira sushi banda di caminda of riba tereno priva. Hunto nos por preveni dumpnan ilegal cu autonan bieu y otro desperdicio,” Gomes a conclui.