Algo cu dos luna pasa a costa 24 Florin awor ta casi 70 Florin
*Tin cierto remedi generico cu awo ta mas caro cu esun original
*Problema di remedi drentando un otro nivel awor na Aruba
ORANJESTAD (AAN): Den pasado ora cu a keda anuncia cu lo bay cuminsa haci mas uso di remedinan generico pa suministra pueblo cune bao di maneho di AZV, a ser treci dilanti cu esaki ta socede pa asina reduci costo di e organo di salud publico na Aruba. Esey ta bin debi cu e tempo aya a yega di splica, cu prijs di remedinan generico ta como 44% te cu 79% mas economico, compara cu e remedinan original di e marca di e inventor y distribuidor di nan.
Ademas di esey, a mustra cu tin diferente compania cu ta produci remedi generico, y e competencia “entre nan mes” ta wordo asocia cu prijs aun mas abao pa esnan generico.
Prijs a yuda hopi: Aunke di comienso semper tabatin personanan cu ta indica, cu nan ta prefera di keda usa remedinan di marca, como cu nan lo por tin cierto producto agrega cu ta yuda e absorcion di esaki, y varios punto mas. Toch en general a bin nota cu hopi hende na Aruba a costumbra rapidamente cu nan.
El a yuda baha costo di prijs pa remedi, incluyendo esnan cu bo ta djis haya cumpra den koophandel den botica mes. Algun aña pasa bo por a hasta haya paki di 40 pida Paracetamol cumpra pa menos di 3 Florin.
E tabata un indicacion cu di berdad e prijsnan abao di generico a yuda reduci e gasto inmenso cu AZV tabata paga pa remedi na Aruba. Kitando esaki for di lomba di e presupuesto, e asegurado general di malesa na Aruba a haya mas placa pa por usa pa otro tratamento.
Mercado instabil: Sinembargo a bin ta notando desde aña pasa caba cu e mercado di remedi generico ta manera instabil. A ser publica algun luna pasa, cu varios dama cu ta busca pildora anticonceptivo generico tabata paga bao di 20 Florin pa haya un paki cu ta dura 3 luna.
Diripiente e anticonceptivo generico ey no a wordo bendi mas na Aruba, y nan a haya nan obliga na cumpra e remedi original di marca, y esaki ta costando awendia como 37 Florin pa un paki cu ta dura apenas 1 luna.
Ultimo simannan, a bin haya sa cu cierto marca di remedi generico a stop di wordo importa na Aruba. Anto esaki ta un marca cu semper ta wordo ofreci na pueblo na prijsnan hopi atractivo mes.
Na su lugar, awor a bin un otro marca generico cu ta costa mas hopi! Algun di nan ta asina costoso, cu nan ta mas caro cu e remedi original mes di marca. E punto aki ta destrui tur e pensamento y logistica, cu “generico ta mas barata cu remedi original”.
Publico a keda sorprendi cu e aumento di prijs di productonan aki cu AZV no ta cubri, pero cu nan tin di paga for di nan cartera. DIARIO a compronde cu un señora a keda sorprendi con costoso su remedi a bira, cu el a djis bay laga e Botica atras sin cumpra e remedinan.
Nan ta spera cu Gobierno lo por check kico ta pasando cu remedinan generico, pasobra awor na 2024 nan ta mustra di ta produciendo diferente resultado di loke a wordo presenta den pasado. Y como cu awendia e situacion economico di hopi famia ainda ta dificil, nan cartera no por wanta un golpi extra cu hasta remedinan generico ta subi desproporcionalmente di prijs.
