ORANJESTAD (AAN): Parlamentario Hendrik Tevreden a indica cu por tin diferencia den opinion riba hopi cos, pero nos tur ta di acuerdo cu nos tin di proteha famia.
Un comunidad ta consisti di famianan. Mas debil e famia ta, mas debil bo comunidad. Nos a bin ta mira cu mundialmente famia como e fundeshi di nos comunidad, ta bou di peliger di extension.
Nos como hende a bin ta practica diferente forma y na nos mes pensamento con ta forma famia contrario na e diseño original di Dios con pa forma un famia y cuida y lucha pa esaki.
Mi mes ta sali di un famia kibra, y mi a sinti e consecuencianan di esaki. Pesey mi escohencia ta simpel. Sin odio, sin rencor cu esnan cu ta pensa diferente, nos tin di proteha e famia tradicional. Den parlamento nos a pasa presupuestonan pa gobierno por habri departamentonan manera hoben y famia. Nos a cambia leynan y aumenta castigo pa abuso domestico den famia. Nos a influencia asta pa e normanan den corte worde re-evalua y mehora pa casonan di abuso den tur sorto di forma, specialmente esun contra di muchanan. Y sigur tin mas pa menciona, pero di otro banda tin mas pa logra tambe.
Pesey mi ta kere y ta sostene directamente o indirectamente tur causa cu ta pro famia. Pasobra sin famia nos comunidad lo disparse. Awe diabierna en bista di e ley di matrimonio di mesun sexo, un marcha a worde organiza pa por entrega tur e firmanan cu a worde recogi na Aruba contra e ley di matrimonio di mesun sexo. E firmanan aki, no ta contra e personanan di mesun sexo, sino contra e pensamento cu por cambia e instituto di matrimonio. Matrimonio ta e instituto unda un famia legalmente ta cuminsa, unda cu un promesa ta worde duna pa keda y sostene otro y e frutanan cu lo sali di e concepcion aki. Pesey ta importante pa defende e instituto di matrimonio, pero na un forma respetuoso na tur otro.
Awe pa 5’or di atardi lo tin un marcha pro-famia tradicional cual ta cuminsa na Citgo Boulevard y lo culmina na Bestuurskantoor, cu ta e entrada oficial di Gobierno. E meta ta pa entrega e firmanan y vocifera nos opinion, mescos cu ta derecho di tur otro cu ta vocifera di nan.
E marcha aki lo ta un marcha pacifico, y cu respet na tur otro cu kisas tin un opinion diferente. Pero si firme den e conviccion cu nos tin di fortifica famianan. Pesey mi ta invita bo bisti un t-shirt blanco of cora y bin marcha. Uni hunto cu bo famia na e marcha pa nos derechonan sagrado pa conserva e diseño di e famia tradicional.
