Den reto final di Augustus DIARIO ta presenta Dobbel Seis
- Gobiernonan di Rutte a permiti pa silencia Ley di Contabilidad
- Peso di PPS y e fantasma di Citgo a entrega Aruba na supervision
ORANJESTAD (AAN)- Cu mester bini cambio den e forma cu Gobierno tin e poder pa abusa di Pueblo, ta algo cu no mester di splicacion. E forma cu a goberna Aruba, tabata completamente contra e pensamento di Statuut, cu a exigi di tur pais igual den Reino, pa e ciudadano Hulandes cu ta biba den cada parti, wordo proteha contra loke Gobiernonan dirigi pa Mark Rutte como Presidente di Gobierno di Reino, a permiti.
Aruba cu e fin di siman aki, ta drenta su reto final pa September 2023 ora Gobierno Evelyn Wever-Croes mester cumpli cu ultimatum cu a worde presenta na Aruba dor di Secretario di Estado Hulandes pa Relacionnan den Reino, Alexandra van Huffelen. E desaroyo ta tuma lugar na momento cu Prome Ministro Hulandes y alabez e dirigente di Gobierno di Reino, Mark Rutte ta prepara pa despedi despues di eleccionnan Hulandes cu su caida a provoca.
E momento a yega pa DIARIO presenta tur su cartanan pa asina sali na defensa di e Status Aparte cu tabata motibo di nacemento di DIARIO y tabata e lucha di e Arubiano pa defende su decision riba e destino propio di Aruba. Awe Reino no por tene ni e actual gobernantenan ni e Pueblo di Aruba, cu lo mester paga resultado di tur e accionnan di Hulanda pa restora un balansa aceptabel pa e pais, responsabel.
Awe e palabranan “Mea Culpa”mester wordo expresa dor di Gobierno Mark Rutte, aunke ya por scucha loke na diferente momento a scucha, cu Hulanda no por interveni den asuntonan di otro pais den Reino, a base di Statuut cu mester wordo interpreta a base di husticia, cu ta e palabra cu ta habri caminda pa democracia.
Awe na un forma special DIARIO ta resumi pa Gobierno Mark Rutte e berdad di e forma cu e como dirigente di Gobierno di Reino, no a lanta para contra formulanan cu Gobierno Mike Eman a aplica pa destrui e base financiero y economico di e pais. Awe DIARIO ta entrega na Gobierno Mark Rutte, e proyectonan PPS, cu a wordo introduci dor di e sabio Mike Eman y su team inteligente universitario.
PPS a deshaci di control di Hulanda na e forma cu el a wordo introduci. Te awe e sumananan enorme cu e Pueblo di Aruba a paga y mester paga ta keda un misterio pa e Pueblo di Aruba.
E base di PPS tabata contra e esencia di Statuut, ya cu el a deshaci di e posibilildad pa Hulanda actua mientras Pueblo di Aruba tabata wordo cruficica. Awe Hulanda kier introduci un medida di supervision despues cu Hulanda permiti Gobierno Mike Eman tira e Ley cu ta regla placa den Pueblo, cu ta e Ley di Contabilidad, den baki di sushi cu e proyectonan PPS.
Gobierno Rutte a permiti Mike Eman haci bofon di control cu e sistema democratico ta exigi di supervision dor di Parlamento, ora el a introduci e proyectonan PPS cu tabata pafor di presupuesto pues no por a wordo controla dor di Parlamento ni Hulanda. Gobierno Rutte a permiti pa Mike Eman orguyosamente, publicamente, priminti Aruba cu Aruba lo mester manda debe pa e futuro cu awe a bati na porta. Esaki no ta suficiente.
Aruba a scapa di e desastre di Proyecto Citgo, cu a wordo introduci na momento cu Hulanda tabata prepara pa bin introduci medida na Aruba na 2013, ora porta a habri pa Aruba papia cu Citgo, cu ta juguete di Nicolas Maduro.
E impacto di e abuso di Citgo di 2013 pa 2017 riba Pueblo di Aruba, cu a bira bofon di mundo ora Mike kier a entrega Aruba na Nicolas Maduro, a bira e final di final pa Aruba cu na 2017 a mira Mike yora y retira for di politica pa Evelyn Wever-Croes mester a dicidi con ta evita cu Aruba ta wordo declara bancarota.
September 2023 ta bati na porta otro siman. Un politico Hulandes tras otro ta bandona e escenario Hulandes cu Gobierno Mark Rutte a laga atras cu necesidad urgente pa cambio y mas cambio. Aruba a keda cu e resultadonan di e fayonan cu Hulanda a comete contra Statuut dor di no actua na tempo y sigur practica un maneho severo di supervision riba Parlamento cu mayoria di AVP cu mester di un “tik op vinger” pa e forma cu el a entrega ciegamente na Mike e posibilidad pa haci y deshaci manera e y Benny Sevinger tabata kier cu e proyectonan Bo Aruba despues cu Mike Eman a horca Florin cu mitae BBO pa bay brasa Nicolas Maduro, cu a pusha Aruba den e aventura di Citgo, cu DIARIO na 2018 a haci rementa pa medio di periodismo!
