Ya na Mei meteologonan a splica cu calor lo kibra record di 2016
- Sistema nobo a avansa di Pacifico pa Region di Caribe y Golfo
ORANJESTAD (AAN)- Aruba como parti di Region di Caribe ta den un fase sumamente importante di e temporada di horcan 2023, cu manera DIARIO a mustra for di basta luna pasa, a kibra e pronosticonan di un temporada trankil pa un temporada activo.
Cu situacionnan cu Aruba no a conoce como costumber lo a presenta, tabata algo cu a wordo adverti pa basta dia i sugur a kibra tur ilusion cu e hecho cu 2023 ta un aña trankil, a wordo kibra.
Loke si no a wordo kibra ta e realidad di e union entre El Niño y e calor inmenso como resultado di cambio di clima.
For di Mei un relato di e Organisacion internacional di Meteorologonan, cu DIARIO a duna atencion tambe algun tempo pasa, a mustra cu tabata casi un siguridad cu e record di calor cu a wordo establece na 2016, lo a wordo kibra.
Esaki tin su resultadonan pa Aruba cu ta situa den e centro di region di Caribe, un area di laman pa un parti grandi cu na ambos banda tin un Oceano cu ta interferi den su estado di tempo.
Ta e situacionnan special cu naturalesa a entrega na region di Caribe, awe ta haya expresion ora loke tabata costumber a wordo kibra.
Den pasado e hecho cu un sistema ta afecta e region for di direccion di Pabou tabata algo sumamente particular.
Aruba a registra esaki cu horcan Lenny, cu a pasa pa Noord di Aruba bay direccion pabou pa despues bolbe y bira amenasa directo pa Aruba na final di temporada na November y bira un desaster pa e region di Caribe debi na e hecho cu di regreso su el a cruza Atlantico for di pabou.
Paisnan manera Saba cu cera halto por ehempel a haya nan mes den problema serio pasobra e medidanan cu nan tabata acostumbra pa tuma, no tabata valido mas den e sorpresa cu a causa destruccion grandi.
Na e momentonan aki, manera for di ayera DIARIO a skirbi, Aruba y henter region di Caribe ta observa otro sistema cu a penetra for di ayera den e region for di pabou.
Ta trata aki di un sistema cu tabata activo den e Oceano Pacifico pero a cruza America Central pa awor sigui forma su mes den region di Caribe y bay bira amenasa pa Golfo di Mexio y manera tur cos ta indica e region di Merca na Golfo.
Na e momentonan aki no tin actividad cu menasa pa Aruba cu si mester tene cuenta cu e calor enorme, mientras e normalidad di biento y presion di aire mester bolbe.
