Proyecto Wikipedia Aruba a wordo lansa pa engrandece cultura y herencia di Aruba

Kier crea un comunidad di boluntario activo

*Cantidad di articulo online na Papiamento lo crece 

ORANJESTAD (AAN):  Un proyecto hopi interesante pa Aruba a keda lansa diahuebs anochi na Biblioteca Nacional Aruba. Ta trata di e proyecto Wikipedia Aruba.

            Ginelly Quandt, Wikimedian den residencia y Ricardo Arends, Coordinador, ta e personanan tras di e proyecto aki. DIARIO a combersa cu Ginelly Quandt y el a splica mas di Wikipedia Aruba.

            El a laga sa cu e proyecto a wordo lansa door di Wikipedia Hulanda hunto cu partnernan manera Monumentsfund Aruba, Biblioteca Nacional Aruba, Archivo Nacional Aruba y UNOCA cu patrocinio di Fonds voor Cultuur Participatie.

            Quandt a agrega cu aworaki nan ta den e fase inicial di e proyecto. Nan a cuminsa na januari 2025 cu algun tayer di instruccion cu a tuma lugar na Hulanda. Durante e training a haci diferente intercambio y proceso riba con ta traha cu tur e plataformanan di Wikipedia. Awor nan ta bek na Aruba y nan meta ta pa crea un comunidad di boluntarionan.

            El a splica cu Wikimedia ta e plataforma principal y tur e otro plataformanan tin uzo varia manera entre otro Wikimedia Commons caminda por 'upload' potret, Wikipedia ta pa articulonan, Wikipedia Data cu ta focus den conecta cierto datonan cu otro, Wikisources, pa documentonan bieu, por ehempel.

            Tin hopi mas plataforma, pero loke nan ta enfoca riba dje ta Wikipedia cu ta pa skirbi articulonan enfoca riba idioma Papiamento, el a remarca.

            Diabierna durante e evento di 'kick-off'' a keda presenta tur loke esnan interesa por haci cu Wikipedia. E meta tabata pa tur hende cera conoci con facil e ta. "Abo na cas por hacie sin un hefe of presion. E ta keda na abo cuanto tempo bo kier dedica na dje y boluntariamente bo ta hacie. Abo por kies cua plataforma abo ta interesa den dje", Ginelly Quandt a indica.

            Hunto cu e partnernan lo ofrece actividadnan caminda e interesadonan por bini hunto y skirbi riba cierto temanan. Por ehempel, riba carnaval y asina yega na e skirbimento di mas articulonan tocante carnaval, Quandt a señala.

            Banda di esaki tin partnernan cu ya caba ta aportando manera Biblioteca Nacional Aruba y Archivo Nacional Aruba cu ta ofreciendo nan archivonan y potretnan tambe pa pone riba Wikipedia. El a accentua cu Wikipedia mundialmente hopi hende ta uz'e. Asina cu bay riba Google, Wikipedia ta un di e prome links cu ta haya. Esey ta haci e coleccion bira mas accesibel pa tur hende na mundo.

            Finalmente Ginelly Quandt a invita tur persona cu ta interesa of cu kier haya sa con nan por aporta na Wikipedia Aruba pa acerca nan a traves di e rednan social of pa medio di email: This email address is being protected from spambots. You need JavaScript enabled to view it..