Minister Rocco Tjon:
ORANJESTAD (AAN) — Den conferencia di prensa di Gobierno, Dialuna 14 di Augustus, Minister Rocco Tjon a papia tambe, tocante e proyecto “Veilige Barios” (Barionan sigur). E dignatario a bisa cu esaki ta un proyecto cu ta den pleno ehecucion, y e ta enfoca riba tres diferente aspecto.
Un di e aspectonan ta infrastructural, manera iluminacion den e barionan manera a cuminza haci na San Nicolas, cu a conoce caba 108 punto di iluminacion y aworaki ta preparando e siguiente fase cu, probablemente, lo bira Mabon.
Esaki ta un parti di Veilige Barios, pero e parti cardinal ta percura pa rebiba tur e centronan di bario. Pa e motibo aki, aña pasa a firma e MoU cu tur e centronan di bario y CEDE Aruba. E plan aki completo ta den pleno ehecucion, y ya caba 12 persona a wordo tuma den servicio pa tur e centronan di bario, na un forma mas uniform y centraliza aworaki, y tin cu tene cuenta cu tur e aspectonan y pa di e forma aki por tin mas actividad den e barionan.
Tjon a menciona cu luna pasa e tabata tin reunion cu señor Daniel Tecklenborg director di CEDE Aruba, y si tur cos ta bon e website ta wordo lanza pa loke ta Veilige Barios. E centronan di bario mes a scoge pa e nomber di barionan unico, y ta bay ta completamente accesible pa henter comunidad. Nan ta bay sa exactamente, cual actividad lo tuma lugar, den cual centro di bario, ki dia y ki ora.
E dignatario a agrega cu e actividadnan aki ta amplio; basa riba e parti di deporte, cultura, enseñanza cu nan ta trahando hopi duro riba dje, pa hacie mas accesible pa personanan cu no por paga un bijles, y cu por haya esaki gratis na un centro di bario. El a reitera cu e proyecto aki ta den pleno ehecucion y ta wordo coordina door di CEDE Aruba.
