Documentalista Natalia Rodriguez ta splica:
*AI ta yudando hopi cu e archivonan colonial cu ta esunnan skirbi na man
ORANJESTAD (AAN): Hopi biaha no por kere cu tecnologia ta bay asina leu cu den cosnan simpel, uzo di tecnologia manera AI of miho conoci como Inteligencia Artificial, ya caba ta wordo implementa na Aruba y cu te hasta tin departamentonan di gobierno cu ta haciendo uzo di dje.
Esey ta e caso di Archivo Nacional Aruba (ANA), cual ta bay lansa oficialmente den luna di september, nan plataforma digital cu yama 'Coleccion Aruba' pa medio di e website www.coleccion.aw.
Den entrevista cu Documentalista di ANA, Natalia Rodriguez, el a duna di conoce cu pa medio di e lansamento di e plataforma aki, ANA kier duna un aporte pa comunidad completo como tambe studiantenan y investigadornan por yega na e informacion cu nan tin mester.
Tin cientificonan of escritornan cu ta haci uzo di e plataformanan digital aki pa haya informacion, pero tambe hopi mucha di scol cu mester di informacion pa nan huiswerk of pa nan proyecto.
Hopi biaha, ora di subi 'Google', e informacion eyriba ta hopi limita y por ta nan falta un parti cu nan no ta haya asina facil aki na Aruba riba topiconan nacional of cultural di Aruba, a bisa.
Rodriguez a agrega cu tin informacion cu ta varia entre papiamento, hulandes, ingles y te hasta spaño. Nan ta mantene e idioma original di e documento of e video. Riba Google no ta bay haya hopi papiamento, pero riba e plataforma aki sigur cu si.
Ta importante pa trece dilanti cu Archivo Nacional ta dividi nan material den tres categoria: dinamico, semi-estatico y estatico. E prome tin di haber cu e material cu ainda no a wordo analisa of cu ainda no a wordo procesa. E semi-estatico ta e material cu ta den proceso pa wordo studia y analisa. Mientras cu e material estatico ta esun cu tin un balor pa contribui na e herencia cultural di Aruba.
ANA semper ta wak cual ta e material cu ta keda cu ne of cu ta bay deshaci di dje despues di tempo. E material cu tin un balor y cu ta parti di e herencia cultural ta conserva nan y poco poco ta wordo digitalisa, a splica.
INTELIGENCIA ARTIFICIAL
Riba esaki, por remarca cu inteligencia artificial tambe tin su aporte. Natalia Rodriguez a menciona cu esaki ta un proceso mas tecnico, pero locual ta e parti basico di dje ta cu ANA ta uza un plataforma di inteligencia artificial cu yama 'Transcrivus'.
E sistema aki ta yuda ANA lesa tur e documentonan skirbi na man y e ta transcribi'e na un manera 'getype' cu ta mas lesabel y ta saca informacion for di dje. E sistema aki ta les'e y e por reconoce e parti skirbi na man.
Esaki ta e sistema cu ANA ta uzando actualmente y esey ta yudando hopi cu e archivonan colonial cu ta esunnan skirbi na man. Asina por saca hopi historia afo, mas informacion, el a splica.
El a agrega cu ora cu e investigadornan kier busca na e fuentenan primario, hopi biaha esaki ta skirbi na man y ta dificil pa lesa e 'handschrift' y e ora AI riba e website tambe ta yuda den e parti aki masha hopi mes. Te hasta erornan tambe ta wordo coregi, a remarca.
Rodriguez a enfatisa cu AI ta un herment confiabel cu ta wordo uza caba na hopi pais. E tecniconan a bay studi'e, analis'e y uz'e pa e sistemanan aki di AI por ta uno confiabel.
