Segun señor Jonathan Tromp di e compania local CGC:
ORANJESTAD (AAN): Durante un conferencia di prensa diabierna mainta, e concorcio priva cu ta existi di CGC Company VBA, Pmec Aruba, Global Pro S.A. y Beicad S.A., a presenta un concepto di nan proyecto cu yama ‘The Triple Zeros for Aruba’. E companianan aki ta companianan local, di Argentina y di Uruguay. E Ceo, inventor y desaroyador di e tecnologia aki ta señor Fernando Vazquez di Beicad.
Segun señor Jonathan Tromp di e compania local CGC - VBA, esaki ta un concepto cu lo cera e ciclo di maneho di desperdicio na Aruba. Anteriormente tambe, nan a duna e presentacion aki na Gobierno di Aruba.
Señor Tromp a splica e nificacion di Triple Zero indicando cu e prome cero ta para pa ‘zero emissions’. Esaki kiermeen cu e sistema cu lo uza pa desperdicio lo no emiti niun tipo di gas toxico. E di dos cero ta para pa ‘zero landfill’. Tur desperdicio cu na e momento aki ta wordo dera, sea na Parkietenbos of na Ser’i Teishi, lo ser procesa pa genera energia electrico y lo no tin mester di dera desperdicio mas.
E di tres zero, cu ta esun di mas importante ta, cu lo no costa Gobierno niun inversion ni riesgo pa e facilidad aki. El a menciona cu e concorcio lo asumi 100% di e inversion, riesgo tecnologico, instalacion, operacion y mantenimento, pa e duracion di e proyecto. Importante pa menciona ta tambe cu lo no reemplasa ningun servicio existente.
Señor Tromp a remarca cu pa e solucion di desperdicio, e proyecto aki ta un soño haci realidad. Esaki, el a remarca, lo no ta posibel sin e experticio y tecnologia di e compania Beicad S.A.
