Proyecto 'Surfside Science' a haya mencion honorario di Premio di Union Europeo pa ciencia di ciudadano

Suyin Ridderstaat ta splica:

ORANJESTAD (AAN):   Suyin Ridderstaat 'Communications and visibility Surfside Science' a duna di conoce cu Union Europeo a entrega pa prome biaha un premio na proyectonan sobresaliente di ciencia ciudadano cu ta promove colaboracion, sostenibilidad y formacion di futuro. Ars Electronica na Austria a asumi encargo di organisa e concurso nobo aki. 

            Tres Proyecto a wordo selecciona como ganador y 27 proyecto a wordo selecciona pa wordo menciona cu honor. Metabolic Foundation su proyecto Surfside Science a keda selecciona entre un di e 27 proyectonan pa ricibi Mencion Honorario como proyecto innovativo den henter Union Europeo.

            Ta importante pa menciona cu Surfside Science ta e unico proyecto den paisnan y teritorionan Europeo den Caribe (OCTs) cu a ricibi e reconocemento aki.

            Por mira tur e proyectonan selecciona cu ta inclui Surfside Science riba e website: https://ars.electronica.art/citizenscience/en/winners/. 

            "Ciencia di ciudadano" ta wordo defini como "trabou cientifico cu miembronan di publico general, hopi biaha bou di direccion di un cientifico profesional”. E proyecto Surfside Science a inclui hopi voluntario pero tambe studiantenan, den e proceso di desaroyo y implementacion di metodonan pa monitorea medioambiente costero. 

            Riba e website science.brenchies.com por mira e prototiponan cu a wordo desaroya pa monitorea calidad di awa y aire y por lesa over di e progreso di e proyecto.

            E proyecto Surfside Science ta posibel dor di sosten financiero di RESEMBID. RESEMBID ta un programa cu ta sostene desaroyo humano sostenibel di paisnan y teritorio Europeo den Caribe (OCTs), di cual Aruba ta parti. RESEMBID ta wordo financia dor di Union Europeo y su partner di implementacion ta Expertise France. E ultimo aki ta un agencia di colaboracion pa desaroyo di Gobierno Frances. 

            Brenchie’s lab ta un makerspace di Metabolic Foundation, Ridderstaat a indica.