Proyecto “Sports for Love” a haci entrega di varios articulo deportivo na tres scol

Ivy Simon, Gerente di Island Finance, contento:

ORANJESTAD (AAN) — Manera ta conoci e compania financiero Island Finance, tin algun aña ta ehecutando e proyecto “Sports for Love”, y e aña aki nan a bishita tres scol pa haci entrega di articulonan deportivo cu e scolnan mester.

            Señora Ivy Simon, Gerente di Island Finance, den entrevista cu DIARIO, na Colegio Hilario Angela, San Nicolas, a bisa cu pa Island Finance ta un honor pa sigui cu e proyecto “Sport for Love”. El menciona cu for di November aña pasa nan a acerca e cabesante, juffrouw Cornelia, puntrando e necesidadnan di articulonan deportivo pa e scol.

            Juffrouw Cornelia a manda full un lista di locual cu nan mester pa e deportenan Volleyball, baseball, entre otronan. Simon a menciona cu hunto cu su ekipo, a cumpli cu e deseonan di Colegio Hilario Angela.

            Señora Simon a informa tambe cu nan a bay dos scol mas cu ta Maria Goretti na Paradera, y Sint Aloysius na Noord. El a expresa cu e proyecto aki ta cumpli pa asina e muchanan sigui activo cu deporte. El a comenta cu Covid cu ainda tin algun scol pendiente, cu nan lo bishita pa asina sigui cu nan bunita proyecto “Sport for Love”.