Errol de Freitas, Secretario di SNBA:
ORANJESTAD (AAN) – E secretario di SNBA a expresa, den conferencia di prensa, cu e grupo di inversionista di Secrets a trece un aliento positivo atrobe pa San Nicolas, pero kico nos tin awo?
“Nos tin awo cu e habitantenan ta lanta, cu nan derecho, pero di otro banda kico e ta afecta mas? Na final di dia mester tin sacrificio pa bo haya e desaroyo. Actualmente, si bo weita e costo di transporte so di tur hende cu ta bay Playa tur dia, imagina bo si nan tin e capacidad di haci esaki pariba. Bo ta weitando cu tin hendenan interesa aworaki. Bay den San Nicolas, biniendo ya for di Centro Medico, wak con tin hende haciendo trabao pa drecha e situacion, no solamente den Caya pero rond. Awo, bo ta weitando e desaroyo akinan?”
De Freitas a referi aki na e obhecion cu algun ciudadano tin pa cu e proyecto Secrets, cu ta bisa cu esaki no ta bon y cu nan ta bay Huez.
De Freitas a comenta cu semper ta wordo menciona e flora y fauna di San Nicolas, su cultura, su musica, su cushina, locual ta bon, pero nunca SNBA a bisa cu nan kier un desaroyo grandi manera Playa, sino algo mas chikito, pero nan kier algo diferente. El a acentua cu nan tin cu biba cu e hecho cu San Nicolas mester di un catalizador, y despues di esaki hopi desaroyo mas chikito lo bay bin y ta biniendo caba, pariba di brug.
Di parti di SNBA nan ta pidi e pueblo di Aruba y specialmente e pueblo di San Nicolas, pariba di brug en particular, cu nan tin cu “embrace” pasobra e no por bay malo, e ta un “spin-up” positivo pa San Nicolas.
De Freitas a subraya cu, na tur e issues cu hende ta bay papia riba dje, hecho ta cu pa tur hotel cu a wordo construi na Aruba, pueblo mester a sacrifica algo.
“Nos no ta sacrificando pa pone un hotel riba un beach, caminda cu nos pueblo tin biaha ta purba yega beach anto un warda di seguridad ta bisa bo ‘ey’. Akinan nos ta free. Nos ta papiando cu e desaroyadornan; no tin hende mas duro cu nan cu nos directiva. E presidente hasta tin biaha mi tin miedo, pasobra e ta bisa nan tambe ‘bo tin cu corda, tene cuenta cu ‘esaki ta e pida beach, make sure cu e pueblo di San Nicolas por disfruta di dje’. Pero ki dia e pueblo di San Nicolas ta bay haya un desaroyo, pueblo di Aruba? Si esaki nos tin, e ta un ‘spin up’ algo otro cu tin, lague pasa! Nos no kier motocicleta ni deporte aquatico riba nos beachnan”.
El a acentua cu San Nicolas ta un pueblo structura y hopi critico pa otro, anto corda riba un proyecto, y a referi na e tempo cu San Nicolas tabata tin solamente un servicio di ambulance, pero aworaki nan ta orguyoso di tin ImSan cu ta un hospital cu un desaroyo positivo y cu ta produciendo, y yudando comunidad no solamente di San Nicolas, pero Aruba en general.
