Tema 2022: “Logra husticia social atravez di trabao”
ORANJESTAD (AAN)—Diadomingo 20 di Februari ta wordo celebra e Dia Mundial di Husticia Social. Ta riba dia 26 di November 2007, cu e Asamblea General di Nacionnan Uni, a proclama e dia 20 di Februari di cada aña como Dia Mundial di Husticia Social.
E meta di e celebracion aki ta pa respalda y sostene e trabao di e comunidad internacional, encamina na eradica e pobreza y promove empleo pleno, trabao decente, igualdad di condicionnan laboral tanto pa hende homber como hende muher, acceso na e bienestar social y husticia social pa un y tur.
Conforme esaki, e Asamblea General ta reconoce cu e desaroyo social y husticia social ta indispensable pa e consecucion y mantencion di e PAZ y e seguridad den e nacionnan, y cu alavez e desaroyo social y husticia social no por wordo logra si no tin Paz y seguridad of si tur e derechonan humano y libertadnan fundamental, no ta wordo respeta.
Asina mes, e husticia social ta pretende haya e ekilibrio entre e diferente sectornan di e sociedad. Pa logra dicho obhetivonan, ta necesario conserva y desaroya e siguiente derechonan fundamental: educacion, salud, alimentacion adecua, vivienda digno, derecho na trabao debidamente remunera, divulgacion di e cultura solidario, derecho na libertad di pensamento y di expresion, ademas, fortalece e seguridad y certeza huridico. Finalmente, e derecho na igualdad sin distincion di sexo, raza, credo of posicion economico.
Dia 10 di Juni 2008, e Organizacion Internacional di Trabao (OIT), a adopta e Declaracion di e Organizacion Internacional di Trabao (ILO), tocante husticia social y pa un globalizacion ekitativo. E Declaracion ta centra su mes den garantiza resultadonan ekitativo pa un y tur, atravez di empleo, proteccion social, dialogo social y e principio y derechonan fundamental di e trabao.
Di mesun manera por puntualiza cu e logro di e Husticia Social aki tambe ta estrechamente vincula cu e Obhetivonan di e Desaroyo Sostenible. E tema pa aña 2022 ta “Logra Husticia Social atravez di Trabao”.
