ORANJESTAD (AAN) – Manera por a lesa den edicion di DIARIO di Diahuebs cu a pasa, minister Dangui Oduber a anuncia un proyecto cu ta encera e renovacion completo di e ex-edificio di e Departamento di Obranan Publico (DOW).
E lo wordo transforma den un joya di edificio, moderno y luhoso den cual Aruba Port Authority lo haya full e di dos piso, y den e prome piso y front ta bin un seccion di ATA, cu ta e Centro di Informacion pa bishitantenan.
E noticia aki a capta bon atencion di comunidad pasobra e criticanan riba e deterioro di e edificio aña aden, aña afo, tabata hopi den e transcurso di e añanan aki. E edificio a bira “vies” un lector di DIARIO a comenta, cu tur e sushi di paloma den vloer, riba acera, den rand di bentana, e murayanan cu a perde color y verf ta ranca su so, y asina por sigui menciona hopi mas y pa colmo, e ta un lugar unda personanan indigente ta busca un espacio pa drumi.
Pues e mal bista no ta algo cu mester kita afo pa turistanan so, pa hendenan local tambe cu ta esnan cu mas a cuestiona e situacion di e edificio aki.
Esnan cu a scucha y lesa e noticia di e proximo renovacion di un edificio tambe considera monumento ta hopi contento y cu e lo tin un destinacion hopi adecua. Nan ta desea gobierno y e instancianan cu ta bin na remarca pa ta e siguiente usuarionan di e localidad, hopi exito!
Riba potret ta mustra tres imagen di con atras e ex-edificio di DOW a bay, locual ta hopi di lamenta.
