ORANJESTAD (AAN) – Den entrevista cu DIARIO, señora Anuesca Baly, director di SKOA, un biaha mas ta urgi mayornan pa aplica pa inscripcion di nan yiu na scol preparatorio.
SKOA ta bezig ta repasa tur e muchanan cu aplica aworaki pa inscribi pa kleuterschool, y e siguiente ta pa tur mucha sea pa inscribi of re-inscribi.
Baly ta haci un yamada na tur mayor cu tin yiu na cas cu mester inscribi of re-inscribi cuminza haci esaki for di 1 di Maart. Esaki pa motibo cu ta hopi importante pa e yiu ta inscribi na un scol, y SKOA ta enfoca riba esaki for di trempan, pasobra tin biaha, mayornan ta warda te ultimo momento pa aplica pa inscripcion, y ora nan bin tin mayor ta bisa cu e ta biba dilanti di porta di scol, y e kier lugar eynan.
Pero, lamentablemente, e momento ey no tin lugar den e scol cu e kier. Pesey SKOA ta duna e mayornan e escogencia di pone riba e aplicacion dos diferente scol. Por ehemplo, si e ta biba na Playa e por pone Imeldakleuterschool of Anglo Kleuterschool, cu ta na banda. Si no ta haya lugar na un ta haya den e otro. Manera ta wordo bisa na Papiamento, esun cu yega prome ta bebe awa limpi. Y esnan cu bin na ora tambe ta haya e lugarnan cu nan ta desea, caminda cu por.
SKOA ta bezig caba tumando aplicacion for di November caba, y esaki lo bay te cu fin di Juli. Fin di Juni nan ta tuma tur aplicacion, despues e fluho ta baha y SKOA ta tuma un break den e periodo di vacacion pa nan caba di verwerk. E ora ey semper ta haya muchanan cu ta bin for di afo cu ta wordo inscribi mas lihe cu por. Pero esaki no ta bira e grupo mas grandi. “Pues, nos ta urgi tur mayor pa cuminza inscribi of pa re-inscribi nan yiu, pa haci aplicacion, inscripcion y re-inscripcion.
