Proyecto piloto pa introduci bijles gratis pa muchanan di basisschool

Den cuadro di proyecto Veilige Bario’s:

ORANJESTAD (AAN): Recientemente, reunionnan preparatorio a continua entre Ministerio di Husticia y Asuntonan Social y FEPA, pa loke ta e proyecto dentro di Veilige Barios, caminda ta bay brinda muchanan di basisschool bijles gratis den e vaknan di rekenen y taal. Un paso sumamente importante, pasobra di e forma aki ta brinda e muchanan un oportunidad adicional y ta yudanan yega na un futuro mucho mas miho pa nan mes.

            E proyecto di Veilige Bario’s ta consisti di diferente pilarnan, un  di e pilarnan aki ta pa crea siguridad den e bario a traves di diferente metodo manera mas iluminacion, mas siguridad den trafico. Banda di esaki, e otro pilar ta pa percura cu tin mas actividad den bario, pa di e forma aki nan no ta riba caya y por participa den mas actividad den e centronan di bario. Pa e parti aki, Ministerio di Husticia y Asuntonan Social ta colaborando cu CEDE Aruba, caminda antes solamente 500 mil florin tawata wordo ubica pa e centronan di bario por opera, awendia esaki a subi te cu alrededor di 2 miyon florin.

            Un otro pilar, ta percura pa mas participacion di e ciudadanonan den e bario mes. Diferente programanan ta enfoca riba deporte, cultura, musica y workshops pa loke ta e parti laboral, pa asina e hobennan por haya mas conocimento, pa asina engrandece e oportunidad pa participa den e mercado laboral. Esaki ta algo sumamente importante, mirando cu e muchanan cu tin mester di e ayudo adicional, lo por haya esaki riba e tereno di enseñansa, specificamente e tereno di rekenen y taal, cual ta dos vak importante pa e desaroyo profesional educativo di e hoben.

            Minister di Husticia y Asuntonan Social sr. Rocco Tjon, a gradici FEPA, kende ta e instancia cu ta bay ehecuta e proyecto aki, caminda cuater basisschool lo cuminsa participa den e proyecto piloto aki y alrededor di 60 mucha lo ricibi e oportunidad pa forma parti di e proyecto aki.