Segun persona cu a traha añanan pa Arubus:
ORANJESTAD (AAN) Un persona cu a traha añanan pa e compania Arubus, a comenta na DIARIO cu e proyecto pa traha y ubica Abri (loke ta un Bushalte cubri cu dak) na diferente area di Aruba, ta data desde aña 1976.
Tur aña te dia di awe e mesun tema ta bin dilanti aña aden, aña afo, incluso tres aña pasa a papia cu EPB y a priminti cu Arubus lo cumpra e material pon’e den man di e scol pa e alumnonan cu ta mas avanza den construccion, traha e Abrinan aki.
Pero te dia di awe nada a sosode, y awo ta bay contrata un compania pa diseña y construi, siendo cu na Aruba mes tin e experticia necesario, ya cu tanto EPB como Colegio EPI por ofrece e man di obra pa produci e proyecto aki, cu ta hopi necesario pa Aruba.
E persona (ex-trahado di Arubus) a comenta cu ta para den ley ta para cu tur tereno unda tin un parada di bus (bushalte) mester construi un Abri y cu dak, pa proteha e usuarionan di calor y yobida, y cu hasta e prioridad ta e muchanan di scol cu ta depende di transporte publico (esta Arubus y autobus).
Pero DOW mes no a bolbe toca e tema aki, pasobra nan mes a menciona e parti di ley algun aña pasa, pero te eynan tur cos a yega. Y maske sea un parada chikito cu dak tur pasahero na Aruba merece, pa warda bus sikiera bao un tiki comodidad. Pues, e fuente di informacion aki ta spera cu awo di berdad, por cuminza wak e proyecto bira realidad maske sea den etapanan ya cu e compania no tin suficiente cen. Pero e alternativa di bay back na e idea di uza e studiantenan (y graduadonan) di e dos scolnan tecnico cu Aruba tin, no mester pone un banda. Ta un manera eficiente y mucho menos costoso si Arubus haci uso di dje.
