A cuminza na Rancho Diahuebs:
ORANJESTAD (AAN) – Glenda Savala Maduro, Trahador di Biblioteca Nacional, ta e funcionario encarga cu organizacion di actividadnan infantil-hubenil pa BNA, y den entrevista cu DIARIO, el a duna informacion tocante un proyecto hopi interesante, y Diahuebs a cuminza den Stichting Rancho: e yama “Drenta bo bario cu Biblioteca Nacional”.
E meta ta pa nan conta storia, canta, haya informacion con pa yega na BNA y con pa fia buki. Y sigur pa pasa pret. E actividad aki Biblioteca a crea pa e muchanan pasa pret den vacacion grandi. Biblioteca tin tres dia di e actividad. Señora Savala a gradici Stichting Rancho pa e oportunidad cu Biblioteca Nacional a haya pa realiza e bunita actividad aki. Diabierna 28 nan tabata na Sport Club na Bubali, di 3 pa 4 or di atardi.
Dia 4 di Augustus e actividad ta clausura den Centro di Bario Dakota den mesun horario di 3 pa 4’or di atardi. Si e actividadnan aki ta resulta exitoso, posiblemente e proyecto lo sigui den otro barionan manera Santa Cruz, Paradera, etc., y esaki ta na Augustus proximo. El a comenta cu Biblioteca Nacional na San Nicolas ta hopi activo actualmente.
Nan a caba di clausura un actividad combina cu buki di pret. Biblioteca na Playa a tene e actividad aki dia 15 di Juli y Biblioteca na San Nicolas, a tene esaki dia 18. Nan a clausura cu participacion di 20 mucha, y na fin di Juli mes ta bay tin un actividad hopi grandi cu participacion di Kerenkentechi, y lo tin contamento di storia, y tur esaki lo tuma lugar na Biblioteca San Nicolas.
Biblioteca ta dispuesto pa traha cu fundacionnan, centronan di bario y tur clase di organizacion cu ta willing pa Biblioteca Nacional bay conta un storia y haci actividad.
